The Definitive Guide to Living in the Capital , Cairo , Egypt

يمنى أحمد

القاهرة فيها أماكن كتير حلوة، بس الفكرة إنك تلاقي المكان اللي يليق مع شخصيتك وتشوف فيه أحلامك وتقدر تتواصل مع نفسك بشكل سليم، العيد خلص كمان.. هتلاقي الزحمة خفت في شوارع القاهرة وهتلاقي عندك استعداد تغير جو لو أنت من اللي قضوا العيد في البيت. كايرو 360 أدركت ده وقررت في السطور الجاية تدلك على 5 من أكتر الأماكن الصالحة للمشي في القاهرة سواء كنت لوحدك أو مع حد بترتاح تتكلم معاه و تقضوا وقت لطيف.. وساعتها هنفتكر أغنية محمد محسن “الكوتشي اللي باش من اللف في شوارعك“!

جزيرة الزمالك

جربت في يوم تنزل الصبح بدري بعد الفجرية تتمشى في شوارع الزمالك، المنطقة الراقية اللي هتروق بالك وهتساعدك على تنظيم تفكيرك بالمناسبة وهتعزز شعورك بحاجات حلوة كتيرة في الحياة. الزمالك واحدة من أمتع المناطق اللي ممكن تتمشي فيها بهدوء في القاهرة وهتلاقي مواصلاتها في كل حتة، مستني إيه.. جرب، صدقني مش هتندم.

ممشى أهل مصر

وده لوحده حكاية، المميز فيه بجد أنك مش هتلاقي أي عربيات معدية جنبك تزعجك أو تصيبك بالتوتر، هتلاقى هناك أغاني بتفكرك بذكريات جميلة وهتسمع نغم النيل بعد ما يسحب منك زعلك أو طاقتك السلبية، وأفضل وقت للمشي فيه بيكون المغريية كده، تقدر وقتها تستمتع بنيل حلو وبغروب القاهرة الزاهي.

جاردن سيتي

أحب أؤكد لك إن شوارع جاردن سيتي هيا منطقة من أفضل المناطق اللي تصلح للتمشية، هتقدر تتخلص من الضغط عن طريق استرجاعك لحياة المشاهير فيها، في العادة هتفضل تمشي فيها مع حد علشان تعيدوا الذكريات، مش هتحس بالتعب ولا إنك مشيت كتير مادام متونس.. وأؤكد لك تاني إنك هتلاقي الونس في شوارع جاردن سيتي.

جزيرة المعادي

مافيش أحلى من إنك تتمشي في وسط النيل، لما تحاوطك المياه من كل مكان هتحس بنشوة عجيبة وهتفضل إنك تتمشي تدندن مع نفسك بأغنية حلوة، أو تتسابق مع صاحبك في الجري، والأهم هتجدد طاقتك والمشي هيساعد جسمك على استعادة النشاط بعد نوم العيد.

حديقة الأزهر

الحديقة دي ليها مميزات كتير أوي، بس يفضل أكتر حاجة مميزة فيها هيا التمشية، إنك تمشي بجانب أسوارها العالية وتكشف لك جزء من مصر القديمة، نسمة الهوا اللي بتضرب وشك في وقت العصاري كده مميزة لوحدها، تقدر تخفف كمان الضغط عن نفسك علشان هتلاقي زرع كتير وورد وشجر في كل مكان عينك تبصله، بالإضافة للبحيرة الصناعية اللي جمالها فعلًا مختلف. تقدر توصل هناك عن طريق موقف الدرّاسة، هتلاقيها بترحب بيك من بعيد.