“ارقص يا حضري”… لحظات مش هننساها في تاريخ حارس مرمى مصر الأول (فيديو)
ارقص يا حضري اعتزال الحضري الحضري السد العالي رياضة فيديو للحضري كرة قدم كورة منتخب مصر نشأة الحضري
Mohamed Talaat
أعلن الحارس المخضرم الملقب بالسد العالي “عصام الحضري” اعتزاله اللعب الدولي، بعد ما شارك في بطولة كأس العالم روسيا 2018، وحصل على لقب أكبر لاعب يشارك ويلعب على مر تاريخ البطولة العالمية بسن 45 عام و4 شهور أمام المنتخب السعودي، وكمان كان أكبر لاعب يشارك عل مدار بطولة إفريقيا بسن 44 عام ويومين.
النشأة
اتولد عصام الدين كمال توفيق، في 15 يناير 1973، في دمياط، وكان له على مدار تاريخه الكروي 6 إنجازات شخصية، وكمان حصل على 38 لقب محلي وأفريقي وآسيوي وعربي، وهو أكتر لاعب شارك مع المنتخب المصري بإجمالي 153 مباراة.
البداية
كانت بداية الحضري في نادي دمياط “درجة ثالثة”، وكان هو سبب رئيسي علشان يصعدوا للدرجة الأولى، ورغم إخفاق منتخب مصر في عام 1996 من الصعود لدورة الألعاب الأوليمبية في أتلانتا ورد فعله الحزين، لكن كان فيه حادث سعيد عوضه عن عدم الصعود وهو أن النادي الأهلي تعاقد معاه بعد الخروج من البطولة، علشان يكتب تاريخ جديد من ذهب له وللنادي ولمصر كلها، وبعدها بسنة في 1997، كان الحضري هو حارس النادي الاهلي بعد ما الكابتن أحمد شوبير سلمه الراية بعد عدة إصابات أنهت مسيرته الكروية.
هدف تاريخي
نجح الحضري في أنه يحمي مرمى المنتخب والأندية في أقوى وأصعب الهجمات، وحافظ كتير على شباكه، وكلل ده بهدفه في مرمى كايزر تشيفر الجنوب إفريقي في بطولة كأس السوبر الإفريقية سنة 2001، واللي أحرزه من مسافة 85 متر تقريبًا، وطبعًا ده ما كنش الهدف الوحيد في مسيرته، ولكن عنده 4 أهداف كمان من ضربات جزاء آخرها لما كان بيلعب مع فريق التعاون السعودي وكان في مرمي الاتفاق.
إفريقيا
نظمت مصر بطولة كأس أمم إفريقيا 2006، ودي كانت انطلاقة مختلفة وجديدة لعصام الحضري اللي لقب بـ«السد العالي» من وقتها، لأنه قدر يدافع عن مرماه ويصد أخطر الكرات والفرص، وحصل على البطولة 4 مرات في أعوام 1998 و2006 و2008 و2010، وكمان على لقب أفضل حارس مرمى في بطولة دوري أبطال أمم إفريقيا 2001 و2005 و2006، وكمان جائزة أفضل حارس في كأس الأمم الأفريقية في ثلاث نسخ متتالية أعوام 2006، 2008 و2010.
أرقص يا حضري
اشتهر نجم منتخب مصر وحارس عرينها برقصه في نهاية كل مباراة مهمة فوق العارضة، علشان كده الجماهير بقت في كل مناسبة وماتش وتدريب تهتف “أرقص يا حضري”.
تحدي الـ”KIKI“
اتعرف عن عصام الحضري خفة الدم، وروحه الحلوة، وكان آخرهم فيديو تحدي الـ”kiki” وكان بيرقص بشكل يعبر عن الروح الجميلة للسد العالي.
https://twitter.com/i/status/1021377656661643265
وأخيرًا أعلن عصام الحضري اعتزاله اللعب الدولي، ولكن مش ممكن يعتزل قلوب الجيل الذهبي لمصر في كرة القدم اللي قدر يعمل كل حاجة حلوة، والغريبة أن أي حاجة حلوة ومميزة في كرة القدم المصرية كان عصام الحضري جزء منها.
