The Definitive Guide to Living in the Capital , Cairo , Egypt

أكاديمية
سَحَر هي أكاديمية بـ تقدم دورات تعليمية وتدريبية في فن ماتستغناش عنه بنت حواء،
هناك بـ تعرفوا أن إتقان فنون التجميل واكتشاف أسراره شيء مش صعب المنال، وبالتالي
ممكن يكون التجميل هواية من هواياتكم، أو البيزنس الخاص بكم.

«أكاديمية سَحَر» اللي
اقترن اسمها باسم مؤسستها سَحَر ولسون، بتقدم 16 دورة متنوعة، يعني مثلاً دورة
الماكياج، والسيشوار والمكواة، الصبغة بتكنيكاتها المختلفة (الهاى لايت والماشات)،
الفتلة والحواجب، لف الطرح، رسم الحنة، تنظيف البشرة، الباديكير والمانيكير، تركيب
الشعر وفرده، والقص وكمان حمامات العروسة المتنوعة. وتختلف الأسعار حسب الدورة
اللي بـ تختاروها، أقل سعر هو 300 جنيه وأعلى سعر 1500 جنيه.

التدريس
في الأكاديمية نظري وعملي، يعني مثلاً القص بأنواعه المختلفة الكاريه والتوب
والبوب كاريه بـ يتنفذ على باروكات والبرامج الخاصة بالعناية بالبشرة أو الحواجب
بـ تتنفذ على موديلز حقيقيين، والحصة بـ تبقى فردية، يعني كل واحد لوحده، وفي
الميعاد اللي يناسبه.

طبعاً
معظم الطلاب والطالبات (والناقدة كاتبة هذا المقال كانت واحدة منهم) ماكانش لينا
علاقة بالتجميل لا من قريب ولا من بعيد، وده اللي ممكن يخلّي تطبيق الدروس بطئ إلى
حدٍ ما، لكن في المقابل صبر وطولة بال المدربات هي اللي بـ تطمن وتشجع الدارسين
إنهم يكونوا إخصائيين تجميل “بريمو”.

ومن ضمن
مميزاتهم كمان الصراحة، يعني مثلاً مش بـ يبخلوا بالملاحظات الضرورية على طريقة الأداء،
يعني همهم الأول والأخير أن الواحد يبقى كوافير أو كوافيرة شاطرين.

ومش بس
كده، جرجس مدير الأكاديمية بـ يستفيض في المعلومات اللى تخص تجهيز البيوتى سنتر،
وكمان أماكن وعناوين المحلات المتخصصة فى تجهيزات صالونات التجميل، برضه ممكن تطلب
شهادة تثبت دراستك لفنون التجميل، والشهادة يا إما بتكون أوكرانية وهى من الكلية
الأوكرانية اللي واخدة الأكاديمية توكيلها، أو شهادة الأكاديمية المصرية.

هـ
تلاحظوا أنكم هـ تتعلموا الالتزام بالمواعيد، عشان المواعيد المضروبة بـ تاخد من
وقت الحصة ومش بـ تتعوض.