The Definitive Guide to Living in the Capital , Cairo , Egypt

وأخيرًا برنامج”X FACTOR”  واللى بدأ عرضه من أقل من شهر وبـ يضم أسماء كبيرة فى الغناء فى العالم العربى: “إليسا، وائل كافورى، كارول سماحة، وحسين الجسمى”، من خلال عرض البرومو الخاص بالبرنامج توقعنا أنه يكون برنامج ضخم، ولما جاءت الحلقة الأولى كان فيها أصوات حلوة فعلًا وأصوات تكملة عدد.
فى الحلقة الأولى عرفنا فكرة البرنامج اللى بـ تعتمد على اختيار المتسابق وده بـ يتوقف على عدة عناصر: الصوت الحلو.. الأداء على المسرح.. الحضور الجماهيرى.. القبول، ويمكن التغاضى عن أى عنصر منهم إلا عنصر الصوت الحلو.
تصفيات البرنامج بـ تعتمد على تقسيم المشتركين إلى أربع فئات: فئة البنات من 16 إلى 25 سنة، وفئة الشباب من 16 إلى 25 سنة، وفئة الفرق، وفئة ما فوق 25 سنة.
لو تكلمنا عن إليسا وحسين ووائل وكارول على مستوى الغناء هما بجد مغنيين جامدين كل واحد فيهم له صوته الجميل والمميز والمحترم لكن قدرتهم على التحكيم فيها شوية كلام، فكارول مثلًا بـ تقول: “الأصوات الحلوة كثير لكن مين اللى عنده X Factor” وبجد مش فاهمينها لأنها أحيانًا بـ تنفعل جدًا مع المتسابق وفى الآخر تقول: “آسفة ما حسيتكش”، كذلك وائل اللى طلع أصلًا من برنامج هوايات بـ ينفعل بشدة مع أى متسابق فـ يرقص ويصفق ويغنى معاه وده بـ يحصل مع متسابق حلو على سبيل التشجيع واللى مش حلو على سبيل التريقة.
لكن إليسا بقى شخصية متزنة ومنصتة رأيها صريح ومباشر، والبوب حسين الجاسمى وهو طبعًا من الأصوات المحبوبة فى الوطن العربى بـ يدور على نجم مثير للاهتمام وهو طيب فى تحكيمه زى شخصيته كده ما بـ يزعلش حد ولو بأيده كان نجح كل الناس.
الجائزة الكبيرة اللى هـ يحصل عليها نجم البرنامج هى عقد إنتاج موسيقى وإدارة أعمال مع شركتين عالميتين هما “روتانا” و”سونى”. المسابقة مفتوحة من سن 16 إلى 80 سنة والبرنامج من تقديم باسم الرارو وإخراج هادى أبى وردة وروان باسيل.. إنتاج البرنامج ضخم بجد خاصة لما نشوف الديكورات المصروف عليها والجمهور الكبير والمسرح الضخم والخدع اللى بـ تحصل ونظام الصوت والإضاءة وأخيرًا المحكمين الأربعة الكبار فى عالم الغناء.
فكرة البرنامج مكررة زى “صوت الحياة” و”ستار ميكر” يعنى بكل صراحة مافيش حاجة ملحة تخليك تتفرج على البرنامج غير حب الفضول.