5 أغاني بتثبت أن التيتر أحيانًا بيكون أقوى من المسلسل
Hager Eissa
بيحرص صناع الدراما المصرية علي تتويج مسلسلاتهم بمقدمات موسيقية أو غنائية مميزة وأحيانًا بتستمر أغنية التيتر وتنجح أكثر من نجاح المسلسل نفسه، في السطور الجاية هنعرفكم على أجمل 5 تترات لازم تسمعوهم حتى لو مش هتتفرجوا على المسلسلات.
تتر مسلسل واحة الغروب (بطولة خالد النبوي ومنة شلبي)
“سافر حبيبي وداخل لي يودعني،
بكى وبَلّ المحارم وأنا قلت إيه يعني
والله فراق الحبايب مُرّ يوجعني”
كلمات الأغنية من التراث الصعيدي واللي أتغنت من الشيخ أحمد بريّن والشيخ العجوز بس الملحن الكبير تامر كروان قدر يحول موال صعيدي مش كل الناس تعرفه لسيمفونية عظيمة، وأختياره لوائل الفشني كان موفق جدًا خاصًة أن صوته معروف و قريب للقلب.
كلمات الأغنية والمزيكا هتدخلك في عالم روحاني جميل وهتحس أن روحك بتطير مع كل صوت بتسمعه.
أما عن تصوير تتر الأغنية فكانت المخرجة العظيمة كاملة أبو ذكري بترسم لوحه بكل كادر كاميرا بتاخده وبتبين قد إيه صحراء مصر حلوة والطبيعة بشكل عام في مصر غنية جدًا وبتضيف كتير لأي إبداع.
الكلمات من التراث الصعيدي
الألحان: تامر كروان
الغناء : وائل الفشني
- تتر مسلسل حلاوة الدنيا (بطولة هند صبري)
” وَجعنا، دموعنا، وضحكة زي الشمس بتشق الغيوم
وحاجات كتيرة عكس بعض تفاصيل حياتنا كل يوم
لُقانا، وداعنا وحب يلمس قلبنا وقت اللزوم
أيام تفوت وسنين تمر بين السعادة والهموم”
بالكلمات دي بتبدأ أغنية حلاوة الدنيا اللي غنتها الجميلة شيرين عبد الوهاب بصوتها الحساس واللي بيحرك مشاعرنا.
بمجرد ما نسمع أول كلمة من الأغنية واللي بتتكلم فيها عن تفاصيل حياة كل واحد فينا واللي بتتمرجح بين السعادة والهموم وأن الحياة كلها مليانة مفاجأت ومحدش عارف إمتي حياته ممكن تخلص وتنتهي فلازم نستمتع بكل حاجه في الدنيا حتي الوجع اللي ممكن جدًا يطلع من قلبه حاجات كتيرة حلوة.
كلمات: أمير طعيمة
ألحان: خالد عز
غناء: شيرين عبد الوهاب
تيتر مسلسل “لأعلي سعر” (بطولة نيللي كريم )
“ملعون أبو الناس العزاز
اللي لما احتاجنا ليهم
طلعوا أندال بأمتياز”
قد إيه نجح مدحت العدل كالعادة في كتابة كلمات أغنية معبرة عن أحداث المسلسل اللي بتقدم فيه نيللي كريم نموذج متكرر في المجتمع المصري وهو الست المصرية الجدعة اللي بتقف جنب جوزها وبتستني منه أنه يقدرها ولكن تأتي الرياح بما لا تشتهيه السفن.
وطبعًا أغلب الناس اللي كانوا المفروض يكونوا سند وعون لنيللي كريم فكروا في مصلحتهم ونسيوها، وقدر صوت نوال الزغبي يختصر الحالة دي ويوصف بكل حزن وشجن الناس العزاز اللي لما تحتاجلهم يطلعوا أندال بأمتياز. وبكل شجاعة بتقول لهم كلمات الأغنية “ملعون أبوكم”. ورغم أن الجملة صادمة لكنها معبرة.
كلمات: مدحت العدل
ألحان: عمرو مصطفى
غناء: نوال الزغبي
- تتر مسلسل “لاتطفئ الشمس” بطولة ميرفت أمين
” الحب، وعذاب الحب، ووجع القلب، إحساس بياخدنا بعيد وياه
العمر بيفوت ويمر، بين حلو ومر، وطريق ماشيينه واسمه حياة
ضحكتنا ودمعتنا في حياتنا حكايتنا مع ناس
وده جنبك أقربلك من قلبك وفي طيبته مافيش
ده بيكره وده بايع بالفطرة وماعندوش إحساس
والقلب اللي مابيحبش يبقي، خسارة يعيش”
وزي ما عودتنا أصالة أنها دايمًا بتقدم لنا الأفضل، فأغنية تتر مسلسل لا تطفئ الشمس كانت مؤثرة جدًا وقدرت أصالة توصلنا أن الحياة مش ممكن تتعاش من غير حب حتي لو كان فيه مشاكل وعذاب وأن القلب اللي مابيعرفش يحب يبقي خسارة أنه يعيش.
كلمات: أمير طعيمة
ألحان: مدين
غناء: أصالة
- تتر مسلسل أرض جو (بطولة غادة عبد الرازق)
حاولت أحسبها ميت مرة علشان أعرف وصلت لأيه
ليه كل اللى حبتهم ماعملوش اللى قالوا عليه
لا لاقية جواب لأسئلتي ولا برتاح من التفكير
ودايمًا يغلطوا لكن أنا اللي بسدد الفواتير
الأغنية مؤثرة جدًا خاصًة أنها بصوت سميرة سعيد واللي بيوضح أن ممكن الحياة تحطنا في مشاكل وتخلينا نتحول لشخصيات غير شخصياتنا وتمشينا كمان عكس السير.
ويا تسلم يا تتحدي كل المشاكل وتقف علي رجلك من تاني.
أما بخصوص تصوير تتر المسلسل واللي ناس كثير أتهمت فريق العمل بسرقت فكرته من أعلان شركة طيران Virgin ولكن للأسف محدش خد باله أن فريق العمل كاتب أنه أستوحي فكرة التتر من Virgin airlines TV ad. وده معناه أنهم مرجعين حقوق الملكية لأصحابها.
كلمات: محمود عبد الله
ألحان: د/ أشرف سالم
غناء: سميرة سعيد
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
