The Definitive Guide to Living in the Capital , Cairo , Egypt

لو فكرنا في واحد من أهم المشاعر الإنسانية في العالم. هنلاقي أن الحب هو  أهم نوع من أنواع المشاعر دي. مش علشان هو محفز أساسي لكل حاجة حلوة بيعملها البشر بس، لكن علشان الحب في مفهومه الواسع مش مجرد حب بين راجل وست، لكن فيه أشكال كتير من أشكال الحب، هنستعرضها معاكم في موضوعنا عن أهم ثيمات الحب اللي شوفناها في دراما رمضان 2023.

الحب الرومانسي في الهرشة السابعة

واحد من أشهر المسلسلات اللي شوفناها في رمضان 2023. بنشوف 15 حلقة من قصص مختلفة عن أشكال متباينة من الحب. بين أشخاص من خلفيات اجتماعية/ إنسانية/ ثقافية/ وعمريه مختلفة. وبنشوف التحديات اللي بتواجه قصص الحب دي، وإزاي ممكن العلاقات تصمد في ظل ظروف صعبة زي انتشار كورونا، أو الأزمات الاقتصادية، وإزاي ممكن الحبايب يوصلوا بعلاقتهم لبر الأمان وسط كل الصعوبات دي!

حب العلم في رسالة الإمام

واحد من أحسن المسلسلات اللي شوفناها في رمضان 2023 خاصة أنه من بطولة المميز خالد النبوي. بنشوف قصة الإمام الشافعي، ورحلته لتحصيل العلم وجمعه، وإزاي الشخص ممكن يحط هدف قدام عينه ويحارب علشان يوصل له، ويذلل كل الصعاب اللي ممكن تواجهه في سبيل أنه يوصل لحلمه. على الرغم من صعوبة الطريق وكثرة المشاكل.

حب الحرية في مذكرات زوج

ممكن نقول إن مسلسل مذكرات زوج من المسلسلات المظلومة إلى حد كبير. مع إن طارق لطفي عامل دور مميز جدًا كعادته.

بنشوف في مذكرات زوج حب من نوع مختلف. من خلال قصة الزوج رؤوف، اللي بيبحث عن حريته بعد التورط لسنين طويلة في جوازة مؤذية له ومحطمة لشخصيته.

من خلال رحلة رؤوف، بنكتشف قد إيه ممكن نندم على كل يوم ضيعناه بدون ما نحصل فيه على حريتنا من أي حاجه بتقيدها، بنكتشف كمان أننا لازم نفهم كويس الفرق بين التزاماتنا في الحياة، وبين شعورنا بالخنقة وعدم الراحة، وإننا مش واخدين الحرية بشكلها الصحيح وغير المؤذي.

حب العدل في جعفر العمدة

نسب مشاهدة غير عادية بيحققها مسلسل جعفر العمدة. من أول البيوت وحتى القهاوي، الناس بتتجمع علشان تتفرج على حلقات المسلسل اللي نجح في اثارة الجدل والاهتمام.

في واحدة من أهم جوانب جعفر العمدة بنشوف حب فكرة العدالة، من خلال جلسات الأحكام العرفية اللي بيشرف عليها جعفر، ويصدر فيها أحكامه بين الناس بالطريقة اللي كان متعود عليها أبوه.

مش دي الفكرة الوحيدة للي بيدور حواليها جعفر العمدة، لكنها واحدة من الجوانب الإنسانية المهمة اللي سلط المسلسل الضوء عليها. حب الإنسان للعدالة وسعيه لها، مع التأكيد على قيمة القانون، في المشهد اللي جعفر بيقول فيه أن أحكامه لو ماعجبتش الناس، يقدروا يروحوا للمحكمة وقانون الدولة.

حب الوطن في الكتيبة 101

وأخيراً. مع واحد من أحلى قصص الحب.. قصة الحب اللي بتبدأ مع ولادة البني أدم وتنتهي بموته. وهي حبه لبلده اللي عايش على أرضها، وعنده استعداد يموت علشانها.

هي دي أهم تيمة بيناقشها مسلسل الكتيبة 101، عمرو يوسف وآسر ياسين وغيرهم، في دور رجال الدولة على اختلاف أجهزتها السيادية، في محاولة مستمرة منهم لوضع حد للإرهاب وتأمين حدود البلد ومنشأتها، وناسها.