-
أحمد عفيفي
-
طبخ
-
من الآن
-
عبير فريد شوقيعبير فريد شوقي
Rasha Zeidan
برنامج “مطبخ 10/10” للشيف أحمد عفيفي هو برنامج الطبخ الوحيد على قناة Ten ووجهة نظرنا في وجود البرنامج على القناة رغم ظهور قنوات كثير للطبخ، أنها قناة منوعات وعليه ما ينفعش تسيب الطبخ من غير برنامج، يعني من الآخر كده علشان تكمل تنويعة البرامج لازم يكون عندها برنامج طبخ.
البرنامج في حد ذاته لطيف، لكن السؤال اللي بـ نسأله لنفسنا دلوقت.. إيه الجديد اللي هـ يقدمه؟ إيه الجديد اللي ممكن يضيفه لنا الشيف أحمد عفيفي؟، أو حتى غيره من برامج الطبخ اللي كثرت في كل المحطات الفضائية؟ غير القنوات اللي بقيت أصلًا متخصصة في الطبخ وبس.
إحنا طبعًا لا بـ نعيب في المحطة ولا البرنامج، لكنه السؤال المشروع لما يبقى فيه برنامج طبخ واحد أو اثنين بـ تبقى المنافسة عالية حتى لو وصلوا لخمسة، وتعالوا نفتكر أول ما طلعت قناة “فتافيت” قد إيه الناس كانت متابعاها ومركزة معاها، طيب بلاش.. نفكركم بمطبخ “منال العالم” ولا غيرها من أوائل الناس اللي ظهروا وتكلموا عن الأكل والطبخ، لكن دلوقت بقيت محطات وقنوات وبرامج وفيه صناعة كبيرة وراء الموضوع وده مهم علشان من الطبيعي أن الناس مش هـ تبطل أكل ومش هـ تبطل تتفرج على الشيف وهو بـ يطبخ.
الشيف أحمد عفيفي عنده قبول على الشاشة جدًا ودي ميزة من عند ربنا قبل ما تبقى شطارة، هو صراحة بـ يفسر كل حاجة في الأكلة ودي برضه من مميزاته، يعني مش بـ يحب تعدي كده وخلاص، لا لازم يسهل عليك الموضوع وبـ يبقى عاوز يقرب من المشاهد علشان كده بـ يستخدم التعبيرات الدارجة اللي بـ يستخدمها الناس في الشارع وفي مطبخها، وده طبعًا علشان يقرب المشاهد منه ويحسسه أنه معاه وزيه فـ يتقبل منه أي حاجة ودي طريقة جميلة جدًا في لفت أذن المشاهد قبل عينه، يعني هـ تلاقوه مثلًا يقول “لو عندنا عزومة وعيلة كبيرة تعالوا نجيب سمكاية حلوة كده، طب هو الفرن هـ يكفي؟ آه هـ يكفي، سيبي الأكل على النار يعيش حياته”.
ولأن البرنامج تقديم شخص واحد فيا إما هـ يكون دمه ثقيل أو لأ، صعب يكون فيه وسط صراحة.. لكن لازم نقول أن عفيفي دمه خفيف وله أسلوبه التعليمي، يعني في مرحلة أبعد من أنك تقول المقادير وطريقة الطبخ وخلاص، مش كده وبس ده كمان معاه فريق شاطر.. يعني فيه حاجات بسيطة لكنها تبين أن المخرج شاطر زي أنه يثبت صورة المقادير في توقيت بـ يشرح فيه الشيف والناس مش محتاجة صورة الأكل قد ما محتاجة صورة المقادير، وفريق التصوير كمان شاطرين بـ ينقلوا الكاميرا في زوايا مختلفة وجايبين المطبخ كله، وديكور المطبخ هايل واسع ولونه أبيض والمزيكا اللي بـ يستخدمها كلها حيوية. عامة هو شخصية حيوية بـ يحاول يعمل حاجة فيها مزاج لأن الأكل محتاج مزاج.
