مسلسل 6 شهور: إزاي تحقق التارجت وتعمل دراما من غير مط ولا تكرار؟!
اعمال وتش ات الاصلية مراد مكرم مسلسل 6 شهور مسلسلات وتش ات مشاهدة مسلسل 6 شهور نور النبوي نور ايهاب
Cairo 360
مع بداية عرض مسلسل 6 شهور على منصة WATCH IT كنا حاطين إيدنا على قلبنا، لأننا تعودنا أن البدايات القوية للمسلسلات العربية، بتنتهي بيها في النهاية لطريق من 2 ، إما السقوط في فخ التكرار والمط لزوم الوصول للرقم السحري (30 حلقة) ولو كان الوصول ده على جثة المنطق والأحداث والسيناريو والمشاهدين نفسهم لو تطلب الأمر، وإما السقوط في فخ محاولة إبهار المشاهدين من خلال حبكات ملتويةPlot twist متشابكة ومتداخلة لدرجة تضايق المشاهد نفسه.
المط والتكرار ومحاولة الوصول ل 30 حلقة بأي ثمن كان السمة الأساسية في أعمال كتير من أعمال رمضان الماضي، ومحاولة عمل Plot twist على حساب المنطق كان غلطة وقع فيها مسلسل زي (برغم القانون) كان ممكن يكون واحد من أفضل مسلسلات الموسم لولا المشكلة دي.
مسلسل ٦ شهور بقى بيتغلب على كل المشاكل دي، عشر حلقات بس بدون حشو ولا مط ولا تطويل، قصة واقعية ظريفة، ومواقف كوميدية من اللي ممكن تحصل لأي حد فينا في حياته اليومية، علشان كده بنرشحه للمشاهدة وعايزين نتكلم عنه بتفصيل أكتر.
مسلسل ٦ شهور بيحكي عن مراد (نور النبوي)، اللي يعتبر من الطلاب المتميزين في كلية الهندسة، لكن ولظروف مش عاوزين نحرقها عليكم، بيضطر يسيب حلمه ومشروع عمره، علشان يشتغل في قسم المبيعات في شركة تسويق عقاري كبيرة. وهناك بيقابل مديره المباشر كمال (مراد مكرم) واللي بيعرفه أنه علشان يتم قبوله في الشغل، لازم يدخل في منافسة على تحقيق أعلى مبيعات مع بنت تانية بتلتحق بالشغل زيه واسمها لطيفة (نور إيهاب).
المنافسة بين مراد ولطيفة ليها طبعًا جانب كوميدي رائع، لكن في نفس الوقت بتورينا حجم التنافس في عالم مبيعات الوحدات العقارية، وإزاي فريق التسويق فيه أنماط مختلفة من البشر، مابين الحاقد، والمجتهد، والشريف واللي عاوز يعمل أي حاجة علشان يحقق الـTarget. وده عمل تنوع أكسب المسلسل روح مرحة وجميلة جدًا.
لازم نعترف أن نور النبوي أصبح له شخصيته التمثيلية الخاصة، اللي يستحق يتم تقييمه عليها بعيدًا عن كونه ابن الفنان الكبير خالد النبوي. وده صعب خاصة مع ألعاب الجينات اللي تخلينا لو غمضنا عيننا وسمعنا نور وهو بيتكلم هنتلخبط بينه وبين النبوي الأب، لكن ده لا يمنع أن نور النبوي بيحاول يخلق لنفسه هوية تمثيلية بعيدًا عن والده، وده – وإن كان صعب- لكن مش مستحيل وسبق وقدر يعمله كريم محمود عبد العزيز ومحمد عادل إمام وغيرهم.
نور إيهاب بتجسد دور بنت اسمها لطيفة، ونور فعلًا لطيفة، وليها طلة الكاميرا بتحبها، إحنا متابعين نور من أيام ما كانت طفلة في مسلسل اختيار اجباري، والحقيقة عاجبنا اختيارها لأدوارها وانها بتشتغل على نفسها وبتتطور من دور للتاني. نتمنى بس ماتقعش في فخ التكرار وماتبقاش مجرد إعادة وإزادة لدور البنت اللطيفة الطيبة الـ(كيوت).
مراد مكرم أو (الأكيل) اللي كلنا عارفينه. الراجل ده بيثبت في كل مرة يقف فيها أمام الكاميرا أنه غول تمثيل حقيقي. وبيمثل من منطقة الراحة بدون افتعال أو ابتذال، والحقيقة ان إمكانيات مكرم التمثيلية مش مستغلة بنسبة 100٪ لحد دلوقت، وده لما يحصل نقدر نراهنكم إننا هنشوف موهبة تمثيلية ممتازة هبتفكرنا بجيل الكبار.
على الرغم من ظهوره القليل، لكن الفنان محمد عبد العظيم عمل دور ممتاز ومعلم مع الناس قوي، ويكفي اننا نلاحظ أدوار عبد العظيم في الفترة الأخيرة علشان نعرف إننا قدام شخص بيضيف لكل عمل يشتغل فيه، ومجرد ظهوره على الشاشة بيكون دليل على إننا هنشوف دور كويس جدًا، حتى لو عدد مشاهده قليلة.
في تجربته الاخراجية الأولى، يعتبر مصطفى صولي ناجح بجدارة، وقدر يقدم عمل بعيد عن الملل وإيقاعه سريع وأحداثه مافيهاش تكرار، كل ده وسط جو كوميدي خفيف، بدون ما ينسى لحظة إنه بيقدم مسلسل عائلي بيدخل كل بيت، وبدون ما يضطر يقدم إيفيهات خادشة أو مشاهد تدخين أو تعاطي، ودي حاجة تحسب له وبشدة وكان كل حاجة قدمها في المسلسل مختلفة ولطيفة حتى تتر البداية اللي ظهر فيه بصوته وهو بيعرفنا بنفسه “أنا مصطفى صولي مخرج مسلسل 6 شهور” في لفتة جميلة منه.
مسلسل 6 شهور مثال على النجاح اللي ممكن يعمله صناع الفن في مصر، لو بس امتلكوا الشجاعة لرفض القوالب الجاهزة في السيناريوهات، والتمرد على ضرورة تقديم عمل من 30 حلقة، وضرورة وجود بطل واحد باسم تقيل علشان (يشيل) المسلسل، كل دي حاجات مابقتش ضرورية للنجاح الحقيقي، و(6 شهور) أكبر مثال على كده.
