The Definitive Guide to Living in the Capital , Cairo , Egypt

من وقت إطلاقها ومنصة شاهد بتوعد المشاهدين بمستوى مختلف من الترفيه العربي الخالص. ومع دخولها في إنتاج الأعمال لحسابها الخاص، أصبح من الواضح أن ده مش مجرد شعار، وأن جملة “أعمال شاهد الأصلية” أصبحت زي ختم جودة لا يمكن التنازل عنه للمُشاهد. وده ينطبق بشدة على مسلسل موضوع عائلي اللي تمت إذاعة أخر حلقات الجزء الثاني منه مؤخرًا.

في الجزء الأول من (موضوع عائلي) شوفنا مُعضلة إبراهيم (ماجد الكدواني) اللي بيكتشف أن له بنت من زواج سابق، وأن البنت ماتعرفش أنه والدها، وبيقع في حيرة ما بين أنه يعرفها أو أنه يفضل قريب منها بهوية مزيفة. وكانت الرحلة كوميدية وممتعة الى أقصى حد. في الجزء الثاني بنشوف رحلة إبراهيم مع بنته مع اقتراب زواجها. الرحلة اللي بيحاول يقطعها وهو تحت تهديد مرض صعب، بيجبره يخبي تفاصيله عن أقرب الناس له علشان ما يسببش لهم حالة من الهلع.

الشخصيات اللي وقعتنا على الأرض من الضحك في الجزء الأول لسه مكملة معانا في الجزء الثاني، وتمت إضافة شخصية الدكتوره مريم (الفنانة نور) علشان تدعم أحداث الجزء الجديد. شخصية مريم ماكانتش كوميدية بقدر ما كانت مهمة علشان نشوف الأحداث الجديدة من خلالها، العبء الكوميدي كان في الأساس على سماء إبراهيم (زينب) و القادم من عالم الستاند اب كوميدي طه الدسوقي (حسن) والاكتشاف المعجزة لفريق المسلسل متمثلا في شخصية رمضان حريقة اللي قام بدوره الفنان المميز محمد رضوان.

أحلى ما في الأداء التمثيلي أننا أصبحنا (عشرة) مع الشخصيات، وعارفين كويس لزمة كل واحد فيهم، كل اللي عمله المسلسل هو أنه قدم جرعة إضافية من الكوميديا بدون (تجويد) لضمان تحقيق نفس النجاح، وقد كان بالفعل.. خاصة مع توزيع الإيفيهات والمواقف الكوميدية على الجميع وعدم جعلها كلها خاصة بالبطل ماجد الكدواني زي ما بنشوف في أعمال تانية.

والصراحة أن الكدواني مش محتاج أي (نفاق) أو زياده لمساحة دوره. هو بالأساس قاعد ومتربع في قلوبنا مش بس بسبب دوره في المسلسل، لكن بسبب إجمالي أعماله اللي مش بنشوف فيها عمل واحد وحش أو غير متقن أو غير متعوب على تفاصيل شخصيته. الكدواني مش بس نجح أنه يوقعنا على الأرض من الضحك في بعض المشاهد، لكنه كمان نجح في أنه يبكينا في مشاهد تانيه. وده نجح فيه بالتعاون مع السيناريو المتعوب عليه والمكتوب باحترافية.

من الشخصيات الجديدة اللي تمت اضافتها أيضا، شخصية ياسمين وافي، في دور (أم ليث) وده كان دور أكتر من رائع، وأعطانا انطباع حقيقي أن (ياسمين) مش مصرية، نتيجة لهجتها في نطق الكلام. لكن في الحقيقة هي مصرية، وهي بنت الممثل الشهير ممدوح وافي الله يرحمه. وبنشوف معاها شخصيات من الجزء الأول اتغيرت تماما في الجزء ده زي محمد شاهين و محمد القس (غازي) اللي قدموا أدوار مركبة شريرة بلمسة كوميدية لا تخفى على أحد.

استخدام ضيوف شرف في المسلسل (نيللي كريم ومي كساب وبيومي فؤاد) مكانش حاجة كويسة، ومش عارفين ليه معظم الأعمال العربية في الفترة الأخيرة مصرة على الاستعانة بضيوف شرف كتير. والمفترض في ضيف الشرف أن ظهوره يقدم جديد، لكننا حسينا أنه كان ظهور من أجل المجاملة لا غير.

النجاح الكبير للمسلسل على مدار جزئين، والـ(هارموني) بين كل أبطاله، مش بيقول غير أننا أمام مخرج متميز هو (أحمد الجندي) إسمه أصبح علامة جودة لا اختلاف عليها أننا أمام عمل كوميدي مميز ومتعوب عليه.

بنهاية حلقات الموسم الثاني من موضوع عائلي، بنتوقع أنه يتم تصوير موسم ثالث. هل هاينجح فريق العمل أنه يسدد (هاتريك)؟ نتمنى نشوف موسم ثالث قوي ومميز زي المواسم السابقة وأكتر.