The Definitive Guide to Living in the Capital , Cairo , Egypt

كلنا فاكرين المشهد الشهير للست الملحدة اللي ظهرت في أحد البرامج وهي ملثمة، وبدأت تتكلم لحد ما المذيعة طردتها فجأة باعتبار اللي بـ تقوله مش عاجب المذيعة، الموضوع كان كله مزعج بدرجة كبيرة جدًا، وتجاري رخيص، ما حدش احترمه ولا حبه، لكن على النقيض تمامًا بـ نشوف برنامج كامل للحبيب علي الجفري على قناة cbc طوال شهر رمضان حول الإلحاد بـ يستضيف خلاله 30 شاب، كل حلقة شاب ملحد يتكلم عن شبهة من الشبهات اللي هو شايفها ورد الحبيب علي الجفري عليها.

“لحظة سكون” هو العنوان اللي تم إطلاقه على الموسم الرابع من “آمنت بالله”، التتر السنة دي بصوت خالد الحجار، وألطف حاجة أنه يكاد يكون البرنامج الوحيد اللي فيه ترجمة المحتوى  للغة الإشارة علشان الصم والبكم، أما الشكل العام للبرنامج بـ يبدأ بتقديم الإعلامي خيري رمضان للحبيب علي الجفري اللي بـ يظهر في البرنامج بصفته مؤسس مؤسسة طابة للأبحاث والاستشارات مش على أنه داعية ديني!

من خلال المتابعة نقدر نقول أن كل داعية وله مذيع بينهم وبين بعض كيمياء خاصة، يعني مثلاً الإعلامي محمود سعد بينه وبين الشيخ خالد الجندي كيمياء خاصة، كذلك الأمر بين الحبيب علي الجفري والإعلامي خيري شلبي، واللي ما بـ يظهروش تقريبًا غير مع بعض.

عنوان البرنامج اسمه “لحظة سكون” وده لأن البرنامج بالكامل بـ يدور على اللحظة اللي بـ يحتاج فيها كل شخص أنه يختلي بنفسه شوية علشان يعيد اكتشاف نفسه والآخرين، واللحظة دي بـ توصل بالبعض أنه يوصل للإلحاد، والشك في وجود الله، أو كتبه ورسله، وطبعًا علشان البرنامج جاد، واللي بـ يعملوه ناس جادين، فهم بـ يحاولوا أنهم يجيبوا أبرز الشبهات اللي بـ يتم ترديدها على لسان الملحدين.

الضيوف الملحدين اللي بـ يتم استضافتهم بـ يتم معاملتهم بأدب، لأن الهدف هو مناقشة الأفكار مش تجريح الناس، أحمد حرقان شاب عمره 32 سنة، كان من بين الناس اللي تم استضافتهم في البرنامج، كان أكبر شك بالنسبة له في الدين هو قصة زواج الرسول صلى الله عليه وسلم من السيدة زينب بنت جحش، وبدأ يتساءل: “إيه يضمن لي أنه معصوم، ليه ما يكونش كذاب أو مريض”.. كل الكلام ده تم عرضه في البرنامج بدون حذف أو قطع، والضيف الملحد نفسه كان بـ يتكلم بأدب ودون تجريح.

يمكن مش ناس كثير هـ تحب البرنامج لأنه مش في صميم اهتماماتهم، الواحد عاوز يتفرج على حاجة تساعده يكون أحسن، ويطور نفسه روحانيًا ودينيًا، لكن خلينا نقول أنه فرصة أن الواحد يشوف أدب الحوار بين ناس مختلفين وعندهم فرصة يكفروا بعض ويحلوا دم بعض، مع ذلك فيه حوار وفيه محاولة للتفاهم والأخذ والعطا ودي بقيت حاجة نادرة.

علشان تعرف مواعيد وقنوات عرض “لحظة سكون” زور “دليل كايرو 360 للتليفزيون فى رمضان“.