The Definitive Guide to Living in the Capital , Cairo , Egypt

مسلسل “لارا” اللى بـ يعرض حاليًا على قنوات cbc فى الأول كل الناس افتكرته مسلسل تركى كالعادة خصوصًا أن القناة تكتمت على جنسية المسلسل لكن بعد فترة المشاهدين عرفوا أنه “كرواتى”، وممكن التكتم ده يكون علشان جذب المشاهدين لكن المهم أنه حتى الآن بـ يلقى نجاح ونسبة مشاهدة عالية لدرجة أن أشخاص كثير غيروا صورة البروفايل على الفيسبوك وحطوا صور أبطال المسلسل.

أما عن قصة المسلسل فهى رومانسية تحكى عن فتاة فقيرة أحبها شاب من عائلة غنية والده قبطان وهو كمان قبطان زيه وكأى قصة بـ تبدأ البداية المألوفة دى لازم أم الشاب وعائلته تعترض على الزواج خصوصًا أن الفتاة (البطلة) لارا بـ تعمل خادمة فى منزل عائلة البطل ولما أم الشاب يعقوب (البطل) عرفت بعلاقة الحب اللى بينهم طردت لارا من البيت، لكن الموضوع ما انتهاش واستمرت علاقة يعقوب ولارا لحد ما أجبروهم على الموافقة على الزواج، وفى المسلسلات العربى الموضوع بـ يخلص هنا، لكن فى مسلسل لارا الصراع الحقيقى بـ يبدأ من هنا وبعد فترة بـ يسافر يعقوب لأول مرة كقبطان وبـ يترك لارا فى بيت أهله وبـ يبدأ صراع جديد بين البطلة (لارا) وأهل زوجها وخصوصًا أخو زوجها من الأب (خلدون) اللى تسبب فى طردها من المنزل بعد ما أقنع الجميع أنها بـ تتحرش به وبـ تخون يعقوب (زوجها) ويحتد الصراع ويدخل فى منحنى جديد بعد ما بـ تكتشف لارا أنها حامل وبالرغم أن المسلسل طويل والمعلن أنه أكثر من جزء إلا أنه ممتع وغير ممل على الإطلاق وده لأن الأحداث دائمًا فيها جديد وكل ما يزداد الصراع بـ يزيد تمسك المشاهد بالمتابعة ولو انتبهنا هـ نلاقى أن النوع ده من المسلسلات يشبه كثير نوعية المسلسلات المصرية القديمة زى مسلسل “ليالى الحلمية” و”الشهد والدموع” والنوعية دى كانت بـ تستهوى الشباب والكبار علشان كده مسلسل لارا نوعية مشاهديه من شرائح مختلفة وده سر نجاحه ويمكن كمان يكون تفوق على المسلسلات التركية.

ومش بس الأحداث هى عنصر جذب المشاهد لأن المسلسل بـ ينقل لنا حياة مجتمع غريب علينا ويمكن أول مرة نتعرف عليه من خلال مسلسل وهو المجتمع الكرواتى اللى بـ يختلف فى طبيعته عن المجتمع المصرى والعربى لكن يظل المشترك الإنسانى هو نقطة الاتفاق بين المجتمعات و هو الحب، إلى جانب بعض التقاليد والطبقية اللى هى عقدة كل المجتمعات.

ومن أجمل ما يقدمه المسلسل كمان الموسيقى التصويرية وهى مختلفة عن ما تعودنا عليه ولما بـ تمتزج مع الطبيعة والتصوير فى المسلسل بـ تنتج حالة من الاستمتاع. وعلشان كده نوعية المسلسلات دى بـ تضيف لثقافتنا ثقافة جديدة.

لو أنت بـ تحب المسلسلات الاجتماعية والرومانسية أكيد مسلسل “لارا” هـ يعجبك.