The Definitive Guide to Living in the Capital , Cairo , Egypt

من أيام السينما الأبيض وأسود وكان أسوأ مشكلة ممكن تقابل الممثل هي تصنيفه وحصره في عدد معين من الأدوار، محمود المليجي الممثل الكبير بقدراته الهائلة تم حصره في دور الشرير الذكي اللي طول الوقت بيضحك على البطل، عشان كدة مش أي ممثل بينجح في دور ويقدر بعدها ينجح في شكل مختلف تمامًا ويكسر حاجز التصنيف، وده اللي قدر الممثل محمد جمعة يعمله، قدر يخلينا نضحك في مسلسل “الوصية” ويخلينا نخاف منه السنة اللي فاتت في “هذا المساء”.

قدم الممثل محمد جمعة دور “عم ضياء” في مسلسل الوصية، عامل البوفية الكئيب المؤمن بمبدأ واحد هو “كله رايح”، مهما كانت سعادتك وفرحتك فعم ضياء قادر إنه ينهي عليها في لحظة ويقنعك إن ما فيش حاجة مستاهلة وإن” كله رايح”، قدرات جمعة التمثيلية قدرت تخرج من وسط حالة الكآبة والعدمية دي ضحك وكوميدية مميزة جدًا انتشرت بشكل كبير بين الجمهور وبقت أيقونة للضحك في رمضان ٢٠١٨.

جمعة كان أحد الأسباب الرئيسية في نجاح المسلسل، وانتشرت إفيهاته الكوميدية أكتر من كوميديا أبطال المسلسل نفسه أكرم حسني وأحمد أمين، ومش مقصود هنا أي مقارنة، لكن محمد جمعة نجح بطريقته في خلق الضحك  في دور “عم ضياء” بأداء تراجيدي بحت يفكرنا بمدرسة الفنان الكبير نجيب الريحاني، أهم واحد قدم النوع ده زمان في أعماله.

انتماء جمعة لمدرسة فن التشخيص كانت كفيلة إنه يقدم أدواره بطريقة مختلفة ومميزة لدرجة الإقناع، مستحيل الجمهور كان يصدق إن اللي قدم شخصية”فياض” السنة اللي فاتت في مسلسل هذا المساء، الشخصية المليئة بالشر وابتزاز الآخرين والمتاجرة بأخطر أسرارهم، يقدر السنة دي يقدم ضحك وكوميدية مختلفة في مسلسل كوميدي، تميز أداء جمعة مش بس عشان تمثيله الجسدي وتمكنه من أدواته أو نظراته المعبرة عن دوره، كمان جمعة بيقدر يتحكم في أدائه الصوتي بشكل مبهر، وده ظهر بشكل واضح في أدواره السنة دي سواء مسلسل الوصية أو مسلسل أبو عمر المصري، وبالتأكيد لما تتفرج على “فياض” في هذا المساء هتسمع طريقة وأداء صوتي مختلف تماما عن “عم ضياء” في الوصية، وفي نفس الوقت مختلف عن دور الإرهابي “محمد البحيري” اللي قدمه جمعة في مسلسل أبو عمر المصري، وده دليل على مذاكرة وتمكن جمعة من كل الشخصيات اللي بيقدمها.

لم يتوقع جمعة النجاح اللي حققته شخصية “عم ضياء” وكان متردد في قبول الدور لكن المخرج خالد الحلفاوي أقنعه إنه هيقدر بطريقته يخلي شخصية “عم ضياء” الكئيبة مصدر للضحك، وطبعًا جمهور السوشيال ميديا دايمًا له رأي مختلف وكان سبب أساسي في نجاح “عم ضياء” اللي أسلوبه بقى طريقة للتعبير عن أي مشكلة أو حتى حدث مهم بشكل كوميدي، ومهما حصل سواء نجحت أو اترقيت أو حتى ورثت فلوس كتير  مفيش فايدة، لأنه ببساطة زي ما عم ضياء قال “كله رايح .. كله رايح”.

محمد جمعة مش بس ممثل شاطر، جمعة كمان مخرج مسرحي وقدم عروض مسرحية كتير آخرهم مسرحية “فرصة سعيدة” بطولة الممثل أحمد بدير، كمان شارك في عدد من الأعمال السينمائية بأدوار بسيطة كان أهمها دور الظابط اللي بيحقق مع الفنان عادل إمام وهند صبري في فيلم “عمارة يعقوبيان”، وكمان شارك في فيلم العشق والهوى بطولة أحمد السقا ومنة شلبي وأخلاق العبيد بطولة خالد الصاوي، ومع انتشار محمد جمعة في الدراما التلفزيونية آخر كام سنة أكيد هنشوفه الفترة الجاية في أدوار في السينما تناسب حجم موهبته الكبيرة.