The Definitive Guide to Living in the Capital , Cairo , Egypt

مهما اتقال عن المستوى الفني لمسلسله، تلاقي الفضول مخليك عاوز تعرف إيه الجديد اللي هيقدمه السنة دي بعد التاريخ الفني ده كله. مسلسل عادل إمام مش مجرد حكاية وحدوتة بنقيمها فنيًا، لا إحنا أمام عمل لواحد من أهم صناع الفن المصري، حتى لو الفترة الأخيرة قدم بعض المسلسلات اللي لا تليق باسمه وتاريخه.

اشتغل الفنان الكبير عادل إمام طول تاريخه مع أهم الكتاب والمخرجين في صناعة الفن في مصر. قدم أعمال مع وحيد حامد وبشير الديك ولينين الرملي. ومع المخرجين محمد خان ونادر جلال وشريف عرفة. كمان قدم أفلام مقتبسة من السينما العالمية، وقدر يحقق نجاح كبير وقتها، زي فيلم “شمس الزناتي”. إنما شغل عادل إمام كله كوم، وشغله في الكام سنة الأخيرة كوم تاني. اللي كان مقتصر على الكاتب يوسف معاطي. واللي اتهمه كتير من الجمهور إنه السبب الرئيسي في تراجع مستوى الأعمال اللي بيقدمها عادل إمام.

أول تعاون بين عادل إمام ويوسف معاطي كان من خلال فيلم “الواد محروس بتاع الوزير”. وهو من أقل أفلام عادل إمام من حيث المستوى الفني، رغم الإفيهات والضحك اللي موجودين في الفيلم. بعدها قدموا سوا شوية أعمال سينمائية. بعدين قرر عادل إمام خوض تجربة الدراما، وقدموا سوا من وقتها 6 مسلسلات. أولهم “فرقة ناجي عطا الله” وآخرهم السنة اللي فاتت مسلسل “عفاريت عدلي علام”. المستوى اللي ظهر بيه مسلسل عفاريت عدلي علام، كان محرج جدًا لتاريخ ممثل كبير زي عادل إمام. خصوصًا في وجود ممثلين شباب وقتها بيقدموا أعمال قوية. وحصلت على نسب مشاهدة أعلى من عادل إمام.. الزعيم.

تقدر توصف معظم المسلسلات اللي كتبها يوسف معاطي لعادل إمام بإنها “فاضية”. مفيش خطوة درامية واضحة. واعتماد مبالغ فيه على اجتهاد الممثلين، وعلى شعبية إمام وجماهيريته وحب الناس ليه. عشان كدة مسلسل “عوالم خفية” اللي بيقدمه السنة دي ناس كتير كانت مستنياه. لأنه ببساطة عمل فني للزعيم بعيدًا عن يوسف معاطي.

بيدور المسلسل عن حياة الصحفي هلال كامل (عادل إمام). اللي بالصدفة بيحصل على مذكرات ممثلة اتقتلت من سنين. واتقيد الحادث على أنه انتحار. وبعد مطالعته لتفاصيل مُذكراتها، اتأكد أنها اتقتلت على إيد مافيا الفساد. بعد ما خافوا من إفشاء أسرارهم من خلال مُذكراتها.

المسلسل كتابة محمود حمدان وأمين جمال ومحمد محرز. التلاتة قدموا شغل قبل كدة بس ماكنش بنفس قوة العمل مع الزعيم. ومحمود حمدان وأمين جمال بيتعرض ليهم في رمضان السنة دي كمان مسلسل “لدينا أقوال أخرى” للممثلة يسرا. من أهم مميزات سيناريو “عوالم خفية” إنه بيحكي قصص متشعبة وخيوط متشابكة. وفي نفس الوقت كلها منطقية وواقعية، ومفيش أي إحساس بالخلط واللخبطة. مثلًا هنلاقي نموذج المدرس الفاسد اللي بيستغل الطالبات جسديًا. ونموذج تاني لظابط شرطة بيتسغل منصبه لمضايقة طليقته الصحفية. اللي في نفس الجرنال اللي بيكتب فيه هلال كامل. وفي نفس الوقت قدم ظابط الشرطة اللي مش عارف يتجوز، لانشغاله بالقضايا والمهام اللي عليه. وهتلاقي عرض لمشكلات بتواجه المجتمع مؤخرًا، زي انتشار أنواع جديدة وخطيرة من المخدرات، عن طريق أسلوب وتناول درامي مختلف وجديد.

الجزء الأهم في سيناريو عوالم خفية، هي قصة مقتل الفنانة اللي بتقدم دورها “رانيا فريد شوقي”. ناس كتير ربطت بين المسلسل وبين القصة الحقيقية لانتحار الفنانة سعاد حسني. طبعًا صناع المسلسل نفوا كل الكلام ده، لكن ده مامنعش أهل سعاد حسني إنهم يتقدموا ببلاغ لوقف المسلسل. الحقيقة إن فيه حالات انتحار كتير أو اتقال إنها انتحار مماثلة لقصة المسلسل، مش بس حكاية سعاد حسني.   

العنصر الأساسي في كل أعمال عادل إمام الفترة الأخيرة هو المخرج “رامي إمام” ابنه. عادل إمام بشكل واضح طول تاريخه بيميل لأهل الثقة، مش أهل الكفائة. أكيد فيه مخرجين على الساحة لهم حق العمل مع قيمة فنية كبيرة زي عادل إمام، وممكن يطلعوا شغل أفضل ما يمكن. لكن الموضوع ده تقريبًا مقفول في وجود رامي إمام.

من الناحية الفنية، رامي في كل أعماله بيقدر يقدم صورة جيدة وكادرات مختلفة، وبيتطور من عمل لآخر. في مسلسل عوالم خفية قدر يوصلنا من خلال الصورة والكادرات اللي قدمها، حالة التوتر اللي بيعيش فيها الأبطال باختلاف مشاكلهم. وطول فترة مشاهدة المسلسل هتلاقي تناغم بين الحوار المكتوب والصورة اللي بتتقدم. وبالتالي لو فوِت أي مشهد هتحس إن الحدوتة ناقصة.

رغم إن رامي من المخرجين المهمين حاليًا، إلا إن عيبه الوحيد هو شغله مع والده بس، لازم رامي يصنع تاريخ فني بعيد عن عادل إمام الأب. خصوصًا إن المسلسل السنة دي مش بس من إخراجه لا كمان مشارك في الإنتاج.

بطل العمل الفنان الكبير عادل إمام في دور الصحفي “هلال كامل”. عادل إمام ظهوره أمام الكاميرا لوحده له قيمة وأسلوب مختلف. لكن في الحقيقة ورغم إن المسلسل مستواه أفضل بكتير من السنين اللي فاتت، إلا إن الدور اللي بيقدمه إمام خلال المسلسل – وهو الصحفي اللي بيحقق في قضية معينة، واللي بيتطلب حركة كتير للشخصية – كان لا يناسب عمر الفنان الكبير. مشاهد كتير للفنان عادل إمام حلها الإخراج بوجوده على مكتبه، أو بيتكلم في التليفون أو بيفكر. مشاهد معظمها بدون حركة كتير. واعتقد ده لأسباب تخص الزعيم أكتر منها أسباب فنية.

دور الظابط خفيف الدم، اللي قدمه فتحي عبد الوهاب باحترافية، كان من أهم عوامل نجاح المسلسل. فتحي في الحقيقة بيعيش فترة ذهبية في حياته الفنية آخر كام سنة، والجمهور كمان بدء يرتبط بيه ويحبه أكتر. وكمان الفنان الكبير صلاح عبد الله اللي قدم شخصية “دراز أبو المعاطي”، رئيس التحرير اللي ليه تركيبه مختلفة ومتناقضة. ما بين علاقته بهلال كامل وبين المصلحة الشخصية اللي عاوز يحققها. قدر يقدمها بطريقة مميزة.

بشرى قدرت تقدم دور الست القوية المسيطرة بشكل مميز، لدرجة إن بعض الناس كرهت الشخصية. وده يحسب طبعًا للممثل. ورغم ظهور رانيا فريد شوقي الخفيف، إلا إنه كان مؤثر في الأحداث. لأن القصة الرئيسية بتدور حول شخصيتها.

المسلسل كمان بيقدم عدد كبير من الممثلين الشباب، اللي قدموا أدوارهم بشكل وأداء واقعي وقريب لجمهور اللي في سنهم. وده خلى شباب كتير ترجع تتابع مسلسل عادل إمام. من الممثلين دول خالد أنور ومحمد عز وسارة نور، والممثل الشاب محمود حجازي. اللي متفوق بشكل كبير الموسم ده.

من أهم مميزات مسلسل عوالم خفية إننا شوفنا مشهد بيجمع بين “عادل إمام” و”سمير غانم”. بعد غياب أكتر من 33 سنة. تاريخ الاتنين أكبر من مشهد واحد، ونتمنى نشوف عمل شبابي يكونوا هما عناصر الخبرة فيه.