The Definitive Guide to Living in the Capital , Cairo , Egypt

في الأيام الأخيرة ناس كثير جدًا بدأت تتجه لفكرة الأكل الصحي، الأوزان مع الأكل المصري  الأصيل بـ تزيد جدًا، محشي، ممبار، ملوخية وأرز والصواني المتكلفة من رقاق وبطاطس بالفراخ، وغيره وغيره من حاجات تجري الريق وتفتح النفس كانت المسئول الرئيسي وراء زيادة وزن كثير من المصريين اللي ما بقوش طايقين شكلهم ولا لاقيين مقاسهم في المحلات.

المعضلة بقى أنك يا إما تأكل أكل حلو وتسيب وزنك يضرب، يا إما تاكل أكل الرجيم الوحش وده ما بـ ينفعش لأن الواحد ما بـ يستحملش، فيه حل وسط، وهو الحياة الصحية، اللي الواحد يأكل فيها أكل حلو وصحي، وفي نفس الوقت يخسر وزنه بالراحة وعلى مدى طويل، ويتمتع بصحة كويسة، وده اتجاه ما كانتش برامج الأكل التقليدية في القنوات التلفزيونية بـ تخدمه بشكل كويس، لكن مع وجود قناة متخصصة زي cbc سفرة الأمر اختلف، وعلشان ترضي كل الأذواق كان ضروري يكون فيه برنامج صحي، للناس اللي عاوزة تعيش أكثر وتستمتع بصحتها ورشاقتها من غير حرمان.

نور بهجت، وبرنامجها صحي جدًا بـ تحقق الهدف ده لكثير من الناس اللي عاوزة تعيش صح، مقدمة البرنامج نحيفة جدًا، جسمها مثال للنتيجة اللي الواحد ممكن يوصل لها مع المواظبة على الأكل الصحي، ديكور مطبخها مش متناسق أوي مع فكرة الأكل الصحي، اللي كان هـ يليق عليه أكثر ألوان فاتحة زي اللبني أو الأبيض، أو حتى البمبي الفاتح، لكن هي بـ تعوض ده دائمًا في لبسها الشخصي، اللي كله ألوان فاتحة وهادية قريبة من روح الأكل اللي هي بـ تعمله.

ما سبقش شوفنا نور بهجت قبل كده في برامج، لكن اللي نعرفه عنها أنها بطلة اسكواش، درست علوم بيئة في أمريكا، وتعلمت إزاي تطبخ أكل صحي طعمه أحلى وأسهل، وزي ما هي بـ تقول الأكل الصحي مش خس وعيش بني، في اعتقادنا ده البرنامج الأول لها، وطبعًا فيه ما فيه من أخطاء العمل الأول زي الابتسام اللي أحيانًا بـ يكون مصطنع، طبقة الصوت الواحدة اللي ممكن تصيب المشاهد بملل، كمان الموسيقى اللي في الخلفية اللي كأنها مقطوعة من نهاية قطعة موسيقية، طوال الوقت بـ تحسسك أن البرنامج هـ يخلص من أول لحظة، مافيهاش أي جاذبية أو إثارة.

ده عن الشكل، أما المضمون فهو قوي جدًا، نور بـ تجتهد مش بس في أنها تقدم أصناف حلوة وصحية، زي الأرز اللي بالبهار والمكسرات، ولفائف الخس بالجمبري، وكريمة الكب كيك، والفراخ اللي بالجنزبيل، وسلاطة الفاصوليا، وغيرها وصفات كثير يمكن مش بـ نشوفها غير في المحلات الكبيرة.

الحياة الصحية فكرة جميلة، محتاجة تروج أكثر في مصر، لكن بالطريقة اللي خارج بها برنامج “صحي جدًا” عمرها ما هـ تنتشر، وما حدش هـ يقرب للبرنامج إلا لو كان مهتم وفاهم فكرة الأكل الصحي من قبل ما يتفرج وعاوز يعرف أكثر.

نور عندها ميزة مش عند ناس كثير، وهي أنها بـ تعطي نصائح صحية في التعاملات العادية، زي أننا لما نشتري خضار أو أكل نحطه في شنطة قماش بدل الشنط البلاستيك اللي بـ تلوث البيئة، وممكن ما تكونش صحية للأكل، وأن استخدام مكونات طبيعية زي الهون الخشب وغيره أفضل خلال الطبخ وبـ يعطي نكهة مميزة للأكل.

في المجمل خلينا نقول أن البرنامج عنده انطلاقة كويسة من فكرة الأكل الصحي اللي مش معتمد على جدول بـ يقدمه دكتور الرجيم، لكنه بـ يخلي الأكل الصحي أسلوب حياة حلو ومحبب، وبـ يساعد الإنسان يحافظ على طاقته وصحته ورشاقته في الوقت نفسه، مش بس في مجال الأكلات العادية من أطباق رئيسية وشوربات لكن كمان فيما يتعلق بالحلويات، بـ نتمني أنهم يغيروا الديكور الخاص بالمطبخ ويكون فيه جاذبية أكثر في أسلوب المذيعة، والموسيقى الخلفية يكون فيها نشاط أكثر وحيوية تخلي المشاهد يستمتع بالبرنامج وتجذبه للمتابعة، ده غير أنهم عاملين حلقات خاصة لرمضان علشان تقدر تأكل أكل صحي فى الشهر الكريم.