The Definitive Guide to Living in the Capital , Cairo , Egypt

لو عاوز تعرف ثقافات جديدة
ومختلفة وإحنا فين منها يبقى لازم تتابع  قناة الحياة  اللي بدأت تعمل برامج كثيرة كإنتاج مشترك بينها
وبين قنوات أجنبية كثيرة زي قناة bbc الفضائية وDW-TV الألمانية، ومن ضمن البرامج دي “شباب توك”
اللي بـ يعرض على قناة الحياة 2 كإنتاج مشترك بين شبكة تليفزيون الحياة والقناة
الألمانية.

هدف البرنامج الأساسي نقل الخبرات
والتجارب بين مصر وألمانيا خاصة في الأحداث اللى بـ نمر بها اليومين دول، بـ يقدمه
بالتناوب مذيع من القناة الألمانية وآخر من الحياة وفي كل مرة بـ يكون ضيوف
البرنامج من مصر وألمانيا، وأوقات كثيرة بـ يشارك فيه تداخلات خارجية من البلدين، وبـ
يهتم البرنامج بعمل تقارير خارجية لقياس اهتمامات المجتمع المصرى عن بعض الأحداث.

الجميل في البرنامج أنه بـ يقدم تجربة
جديدة من نقل خبرات ومقارنتها بين البلدين خاصة في الفترة اللى هـ تمر بها مصر
الأيام اللى جاية –وهى فترة انتخابات الرئاسة- ونلاحظ أن هناك اختلاف كبير بين
أداء مذيع قناة الألمانية جعفر عبد الكريم ومذيعة الحياة ياسمين سعيد، فالأول بارع
جدًا في أدائه، وعلى الرغم من أنه برنامج حواري لكنه عنده قدرة عالية في جذب
انتباه المشاهد لحد آخر لحظة من طريقته في طرح الأسئلة على الضيوف وأسلوبه في
إدارة الحوار، وبـ يحاول دائمًا يوجد جو من التفاعل والحركة داخل الحلقة، وبـ يهتم
كمان باستطلاعات الرأي الخاصة بالبلدين بعكس أداء مذيعة قناة الحياة اللى بـ تصيب
المشاهد بالملل لأن أسئلتها محددة وتقليدية وغير مبتكرة يعنى مافيش حرفية في
الأداء وده واضح في اختلاف حلقة المذيع الألماني عن المذيع المصري.

وكمان فيه اختلاف واضح بين ضيوف
البرنامج المصريين والألمان، فالأول غير محدد في كلامه وبـ يتكلم في موضوعات كثيرة
من شرق وغرب بعكس الألماني محددين في كلامهم ونقدر نقول أنه خير الكلام ما قل ودل
وده بـ ينطبق عليهم.

من الواضح جدًا أن طبيعة إنتاج
البرنامج بـ يغلب عليه الطابع الألماني كأن البرنامج بـ يذاع بقناة أجنبية بينما
الطابع المصري محدود في البرنامج وبـ يظهر بوضوح في التقنيات ومستوى التصوير، ورغم
كل ده إلا أن هناك تحامل بعض الشيء على طبيعة المجتمع المصري من الجانب الألماني
على الرغم من أهمية وجود الحيادية لأنه بـ يعكس وجهة نظر البلدين زي مثلاً استضافه
البرنامج لعضو مجلس الشعب المصرى وآخر من الألماني عن حزب القراصنة وإزاي كان فيه
اختلاف في ثقافة الحرية والديمقراطية بين البلدين في اختيار ممثليهم، وطبعًا كان
فيه تحامل كبير من المذيع على عضو مجلس الشعب المصري وده يمكن لأن إجاباته كانت
غير واضحة.