The Definitive Guide to Living in the Capital , Cairo , Egypt

“زلطة شو” برنامج ساخر بـ يقدمه مدحت شاكر على قناة الحياة 2 وبـ يعرض يوميًا وبـ يقدم من خلاله نقد ساخر للأوضاع الحالية فى المجتمع، وبالرغم أن نوعية البرامج دى انتشرت بشكل كبير وبقيت متعددة لدرجة أن تقريبًا معظم القنوات لازم هـ تلاقى ضمن برامجها واحد ساخر، وشبكة قنوات الحياة نفسها بـ تعرض برنامج ساخر اسمه (بني آدم شو) يقدمه الفنان أحمد آدم وده طبعًا غير برنامج “زلطة شو”.

 لكن لكل برنامج روح بـ تميزه عن باقى البرامج والاختلاف فى “زلطة شو” ممكن نلخصه فى أن مقدم البرنامج أصلاً شخص كوميدى وله كاريزما معينة وراسم لنفسه شخصية كوميدية خاصة به “زلطة”، والاختلاف الثانى هو مدة البرنامج لأن الحلقة لا تتعدى الـ 10 دقائق، بس فى المدة القصيرة دى بـ يقدر مدحت شاكر أو زلطة ينتقد بشكل مكثف عدد كبير من المواقف سواء لشخصيات سياسية أو اجتماعية معروفة أو ينتقد عدد من الظروف الاجتماعية اللى بـ تمر بها البلد دلوقت.

ومن أشهر الإيفيهات اللى علقت مع المشاهدين وهو بـ ينتقد أداء الرئيس مرسى وأن البلد مش عارفة تتخلص من سياسته فبـ يقول فى حلقة من الحلقات: “مصر عليها عفريت اسمه مرسيكوش” وفى الحلقة كان السيناريو بتاعها أن زلطة رايح لدجال علشان يعرف منه مين اللى عامل عمل لمصر وكأنه عاوز يقول أن كل الحيل اللى عندنا خلصت ومش باقى غير الدجل، لا مظاهرات نافعة ولا اعتراض ولا حتى القضاء.

ومن الإيفيهات اللى برضه كثير من الناس علمت معاهم وهو بـ يقول: “العريان لبس مصر كلها فى الحيط” وفى الحلقة دى بـ ينتقد مشروع النهضة اللى كل رموز الأخوان كانوا بـ يتفاخروا به وعشموا الناس أن المشروع ده هو المنقذ للوضع اللى إحنا فيه.

وزى ما وقت البرنامج قليل جدًا بالمقارنة مع البرامج الثانية، ديكوره كمان بسيط جدًا وغير متكلف وغير ثابت لأن كل حلقة بـ تحتاج ديكور معين، يعنى فى حلقات بـ تحتاج بس مجرد كنبة أو كرسى وحلقات قليلة اللى فيها اختلاف زى حلقة الدجال وحلقات كثير بـ يكون واقف ودى بـ تكون شبه ستاند أب كوميدى، وبالنسبة للستوديو فهو صغير وبالتالى عدد الجمهور قليل غير برنامج “البرنامج” أو “بني آدم شو”.

وبالرغم أن البرنامج بـ يعرض يوميًا 7:30 إلا أن الناس مش مرتبطة به بشكل كبير وده يمكن لأن أداء مدحت شاكر ثابت ما بـ يتغيرش وربط نفسه بشخصية زلطة اللى مش كل الناس قبلتها وفيه ناس بـ تشبهها لشخصية اللمبى، وكل التجديد اللى فى الحلقات هو بعض الشخصيات اللى بـ يستعين بها أحيانًا، والشخصيات دى بـ تكون غير ثابتة ودورها بس أنها تساعده فى الحوار وعلشان كده نسبة مشاهدته بـ تتراجع بالنسبة للبرامج الثانية.