The Definitive Guide to Living in the Capital , Cairo , Egypt

في الثلاث سنين اللي فاتوا احتلت البرامج مكان أساسي في خريطة كل القنوات الفضائية، لكن الناس بدأت تزهق وتتخنق من شغل ناقر ونقير اللي شغال في كل البرامج، الزعيق بقى بزيادة، وشدة الأعصاب عامل مشترك بين كل البرامج، علشان كده رمضان بـ يكون فرصة للراحة من صخب برامج التوك شو، حتى البرامج المعروضة بـ تكون أغلبها دينية، حتى السياسي منها بـ يكون رتمه هادي مش زي الأيام العادية أبدًا، في الموضوع التالي هـ نقدم لكم مجموعة من البرامج اللي هـ تشوفوها على شاشات التليفزيون في شهر رمضان الكريم، بعضها ديني، وبعضها سياسي، وبعضها ترفيهي، وكمان فيه برامج إنسانية، يعني البرامج على كل لون:

“خطوات الشيطان” (الجزء 2) – معز مسعود:

بعد النجاح الكبير اللي لاقاه معز مسعود في الجزء الأول من برنامج “خطوات الشيطان” كانت تجربة جريئة منه أنه يقدم برنامج ديني في قالب درامي، الداعية الإسلامي معز مسعود بـ يكمل الجزء الثاني من البرنامج، رغم الهجوم الشديد اللي حصل له من الجماعات الدينية اللي اتهمته بتشويه صورتهم في البرنامج، لكنه مكمل بحلقات جديدة وأفكار جديدة جريئة، عن الطريقة اللي يقدر بها الإنسان يتغلب على الشيطان في حياته اليومية.

الحلقات مكملة بنفس فريق العمل، والبرنامج هـ يعرض على قناة cbc على المستوى المصري، وقناة mbc على المستوي العربي بإجمالي 29 حلقة.

“عيش اللحظة” – مصطفى حسني:

بـ يحاول فيه أنه يوري الشباب قيمة اللحظة اللي بـ يعيشوها، وأنهم ممكن يعملوا فيها حاجات كثير جدًا كويسة، أو حاجات كثير وحشة كل واحد حسب اختياراته، وأن الإنسان ما يملكش غير اللحظة اللي بـ يعيشها، يا يستغلها صح، يا يفضل عايش في الماضي أو المستقبل وتضيع حياته هدر، البرنامج هـ يعرض على قنوات النهار واقرأ.

“اللهمّ تَقَبَّل” – د. عبلة الكحلاوي:

هـ نشوفه على قناة mbc، هـ ينطلق خلال شهر رمضان الكريم، وهـ تدور الحلقات حول الطريقة اللي ممكن بها الإنسان يتقرب من ربنا، بـ تقدمه د. عبلة الكحلاوي الداعية وأستاذة الفقه في كلية الدراسات الإسلامية والعربية بنات بجامعة الأزهر، بطريقتها المشهورة اللي كلها أمومة وحب، وده طبيعي مع داعية مشهورة بلقب “أم المصريين”.

خواطر (موسم 10) – أحمد الشقيري:

mbc للموسم العاشر على التوالي بـ يواصل الداعية الشاب أحمد الشقيري تقديم برنامجه المميز جدًا “خواطر”، ميزة البرنامج ده أنه مش وعظي، وقصير جدًا، وبـ يتخلل كل تفاصيل الحياة، لذلك هو مناسب جدًا لزماننا السريع جدًا.

في الموسم العاشر من البرنامج بـ يحاول الشقيري أنه يساعد الشباب يعرفوا إزاي يلبسوا، وإزاي يتكلموا، وإمتى يصلوا وإزاي يتعاملوا مع الأزمات، ومع المال، ببساطة إزاي يكونوا سعداء، الشقيري في وسط زحمة تداخل الثقافات بـ يحاول يعمل حاجة مهمة جدًا، وهي إيجاد هوية مميزة للعرب عمومًا والمسلمين خصوصًا.

بركات ملك الحركات (موسم 2) – محمد بركات:

برنامج بـ يقدمه محمد بركات، نجم النادي الأهلي المعتزل للموسم الثاني، واللي بـ يقوم من خلاله بعمل مقالب في ضيوفه من الفنانين بالاتفاق مع نجوم الكرة.

على قناة دريم هـ يقدم بركات حلقات برنامجه الجديدة، عادة برامج المقالب مش بـ تتكرر بنفس المذيع والاسم، لكن الظاهر أن بركات حقق المعادلة الصعبة وهـ يطلع للسنة الثانية يقدم حلقات مضحكة ما قالش كثير عنها، لكن واثقين أنها هـ تكون دمها خفيف.

العاشرة مساء – وائل الإبراشي:

يمكن ده برنامج التوك شو السياسي الوحيد اللي هـ يستمر في شهر رمضان، ويمكن مش كثير من الناس تعرف أنه واحد من البرامج السياسية الأكثر مشاهدة على كل القنوات بناء على كل استطلاعات الرأي اللي اتعملت علشان تعرف إيه برنامج التوك شو الأكثر متابعة من الناس.

البرنامج هـ يُعرض على قناة دريم خلال الشهر الكريم، وهـ يستمر على نفس المنوال، هـ يناقش قضايا يومية تهم المواطنين، وبما أن رمضان هـ يكون خالي من السياسة تمامًا، فمشاهدة العاشرة مساء هـ يكون عليه إقبال ضخم جدًا، خلينا ما ننساش أن وائل الإبراشي أنقذ البرنامج من ضعف المشاهدة ورجعه لبيوت المشاهين مرة ثانية.

حيلهم بينهم – إدوارد:

“حيلهم بينهم”، “حيلهم بينهم كمان وكمان”، “حيلهم بينهم الصلح خير”، دي عناوين كثير لبرنامج حيلهم بينهم اللي مستمر بنجاح على مدى سنين متتالية، وقدمه أكثر من مقدم برنامج، السنة دي الفنان إدوارد هـ يقدمه وكالعادة هـ يدور في إطار كوميدي من المواقف الساخرة لمجموع من الفنانين والمطربين ولعيبة الكرة، إدوارد فارض إطار شديد من السرية على البرنامج الجديد، لأن فكرة البرنامج قائمة أصلاً على خداع الضيوف باسم مختلف وموضوع مختلف عن البرنامج اللي هـ يُعرض على قنوات الحياة وفنون خلال الشهر الكريم.

حقق حلمك – عمرو الليثي:

على قناة الحياة هـ يقدم الإعلامي عمرو الليثي برنامجه الإنساني حقق حلمك، يمكن البرامج اللي من النوع ده معروفة واتعملت كثير، لكن مع أداء عمرو الليثي هـ تطلع كأنها بـ تُقدم لأول مرة، البرنامج فكرته بـ تقوم على تحقيق أمنيات مجموعة من المواطنين “الغلابة” فى شهر رمضان، بـ يستقبل فريق العمل مكالمات ورسائل المواطنين من خلال صفحة القناة والبرنامج علشان يعرفوا اللي هم بـ يتمنوه، وفورًا بـ ينتقل عمرو الليثى بكاميرا البرنامج ومعاه فريق العمل علشان يحقق أحلام المواطنين، واللي بـ تتنوع بين تقديم مبالغ مالية للمحتاجين، و”شَبكة” وجهاز للعرسان، ده غير عمرات وزيارات لبيت الله الحرام، ده غير الشقق طبعًا وشنط رمضان.

رامز جلال قرش البحر:

طبعًا كلنا عرفنا قصة البرنامج ده من قبل ما حتى أصحابه يعلنوا عنه بسبب المشاكل اللي حصلت بين فريق رامز جلال والفنانة آثار الحكيم، البرنامج هـ يُعرض على mbc خلال الشهر الكريم، وفكرته قائمة على عمل مقالب في الفنانين، ينزلوا في البحر وهم راكبين لانش وفجأة يكون فيه دم وزعانف كأنها أسماك قرش، وأذرع بني آدمين، طبعًا المشهد الرئيسي في الحلقات فزع الضيوف وخوفهم، ودي حاجة ما بـ تعجبش ناس كثير، ومع ذلك بـ تحصد مشاهدات بالملايين، إزاي؟! هي دي المعادلة اللي بـ يحققها رامز جلال في البرنامج.

مساء الخير – محمد على خير:

 على قناة cbc two مع الإعلامي محمد على خير في رمضان، البرنامج ده هـ يبدأ من الساعة 11 مساءً لحد الساعة 2 بعد نص الليل، وهو عبارة عن سهرة عائلية يومية، بـ يحضرها جمهور مهتم بالموضوع اللي بـ تطرحه الحلقة.

مقدم الحلقة هو مذيع الراديو الشهير الكاتب الصحفي محمد علي خير، ومش بـ يكتفي بطرح موضوعات عامة، لكن كمان بـ يطرح تجارب مميزة، والقائمين على البرنامج بـ يحاولوا يبعدوا في أداء البرنامج عن برامج التوك شو المعتادة، بحيث يكون أكثر حيوية وحميمية، من الآخر بـ يحاول يطرح الموضوعات اللي بـ تشغل بال المجتمع المصري كل يوم من وجهة نظر المواطن العادي.

ترددات القنوات:

قناة الحياة (تردد 12206 – أفقى)

قناة mbc (تردد 11938 رأسي)

دريم (11900 – رأسى)

cbc two وcbc (11488 – أفقى)