The Definitive Guide to Living in the Capital , Cairo , Egypt

فاكرين لبنى عبد العزيز فى فيلم "آه من حواء" لما كان مش عاجبها العجب ولا الصيام فى رجب وفى الآخر وقعت فى حب البطل.. ما تخافوش مش هـ نحكى لكم الفيلم ولا حاجة، المهم أنها عملت كل حاجة إلا أنها تعرف تطبخ وتعمل عزومة.

لكن دلوقت الصورة دي تغيرت خالص فـهـ نشوف البنت اللى هى ليدى يعنى مانيكير وباديكير وشعر إيه وقوام إيه وتلاقيها دودة مطبخ أجدع من جدتنا "مع الاعتزار لجدتنا".

لما نتكلم عن سالى فؤاد يبقى إحنا أمام نجمة من العيار الثقيل، شاطرة فى الحلو والحادق وده أعطاها شعبية وميزها عن غيرها كثير، نادر لما نلاقى حد شاطر فى الاثنين حتى على مستوى الشيفات الكبار.

والطبخ عند سالى مش بس هواية لأنها كمان بـ تدَرِّس الطبخ للأطفال.. وبدايتها فى مجال الإعلام كانت مع قناة النيل للأسرة والطفل ثم قناة المحور كجزء من برنامج ساعة مع شريف، وفى الآخرcbc  سفرة وبصراحة إحنا كنا بـ نتفرج عليها فى كل ده لكن أول مرة نحبها بجد فى برنامج "حلو وحادق" اللى أظهر مواهبها فى الطبخ وعمل الحلويات.

سالي لها أسلوبها الهادئ الرقيق "السهل الممتنع" يعنى لما تتفرج عليها وهى بـ تعمل أشهر الحلويات بكل سهولة لسان حالك هـ يقول لك: "أنا إزاى ما بـ أعرفش أعمل ده؟".

البرنامج فرصة حلوة للمدامات أو البنات المبتدئات فى المطبخ "سنة أولى طبخ" وفى شهر رمضان البرنامج كان له شكل ثانى" حلو بس" على اعتبار أن رمضان فى الأول طبعًا شهر عبادة.. وهو كمان شهر اللمة والعزومات والحلويات.

وسالى تفوقت على نفسها فى عمل أشهر الحلويات الرمضانية اللى كلنا تربينا عليها لكن على الطريقة الحديثة.. أو الشكل الجميل اللى بـ نشوفه فى الفنادق زى طريقة عمل البسبوسة اللى مش ناشفه ولا مفرفتة والكنافة بالمانجو والكريمة والسينابون وغيره كثير.. شهر بطوله بقى.

ومن الحاجات اللى بـ تبين أن سالى عندها ثقافة عامة مش فى المطبخ بس لكن فى حاجات ثانية كثير أنها بـ تقدم نصائح عن الصحة العامة والريجيم وأهمية شرب المياه وعدم الإفراط فى تناول الطعام.  

ديكور البرنامج مافيهوش جديد زى "معظم" برامج القناة.. بـ نلاقى اختلاف بسيط فى ترتيب المطبخ.. اللون.. الإضاءة هادئة.. والإخراج متميز دايمًا تلاقى عينه على أيد الشيف.

من الآخر سالى فؤاد واجهة مشرفة لأى قناة.. هى عارفة إزاى بـ تهتم بمظهرها وتبقى مختلفة وجمالها فى اختلافها البسيط.