The Definitive Guide to Living in the Capital , Cairo , Egypt

العارضة:

وهلا هلا هلا.. جات الكورة بالعارضة والله، ويا خسارة يا جماعة يا خسارة.. طبعًا كلنا لازم نفتكر جمل من النوعية اللى فاتت دى لما الكورة تيجى بالعارضة ويا سلام بقى لو كان الفريق مغلوب وكان ممكن يتعادل، كلمة بالعارضة ياما ضيعت أحلام فرق، وياما قالها الناس ودى أول نقطة تتحسب لبرنامج بالعارضة، أنه استعمل كلمة منتشرة ومعبرة وعلى لسان الناس.

النقطة التانية:

دخلة البرنامج حلوة يعنى بتضحك بجد، هنلاقى مثلًا مقدم البرنامج الأول دريعان الدريعان وهو بيلعب كورة فى ساحة شباب وبيجيب جون والناس بتهلل وراه وبيضربوا دف وهيصة بجد، دى الدخلة، علشان نروح الستوديو ونلاقى هناك المقدم التانى للبرنامج وهو طارق الحربى الشاب اللطيف اللى طلته حلوة على الشاشة، بيقدم البرنامج على أنه أحد أفضل وأقوى البرامج، علشان يطلع له المنتج من البلاتوه ويقعد يعمل معاه حوار كوميدى أنك إزاى تقول كده وليه مش ملتزم بالسكريبت بتاع البرنامج وضحك السنين بقى.

وينطلق البرنامج بعد كده فى شكل ساخر خفيف يتكلم عن أحوال الرياضة فى كل حتة فى العالم العربى وفى العالم يجيب أخبار النجوم المضحكة، ويجيب فيديوهات من مباريات كتير وغلطات تحكيم وكواليس الرياضة وإيه اللى بيحصل هناك، يعنى بيعرفك الأخبار والحاجات اللى أنت عاوز تعرفها لكن بطريقة خفيفة ولطيفة جدًا، وده اللى هيخلى البرنامج ده ينطلق ويبقى حاجة قوية بجد، وعلشان كده تعالوا نتعرف على مقدمين الموضوع.

طارق:

طارق الحربى أصلًا ممثل ومقدم برامج سعودى بدأ حياته بدور صغير فى برنامج توعوى اسمه "سلامتك" وبعدين تأهل أنه يشارك فى مسلسل "طاش ما طاش" الجزء 15 منه، وبدأ يشتهر من الفترة دى، وقدم عدد كبير من الأدوار فى المسرح والتليفزيون والبرامج اللى كان منها فقرة عن الرياضة على روتانا فى برنامج (النشرة الـ…) وانطلق الرجال من بعدها علشان يتعرف ويبقى نجم مشهور فى عالم الميديا.

دريعان:

دريعان الدريعان إعلامى سعودى أصل عمله كان فى الشبكات والموارد البشرية وهواياته هى السباحة وركوب الخيل، وتحولت حياته سنة 1999 لما بدأ التمثيل على المسرح فى جمعية الثقافة والفنون، وانطلق من بعدها علشان يمثل أدوار كتير من الكوميدى ومنها التراجيدي، لكنه تفوق جدًا فى الأدوار الكوميدية، وكان من أشهر أعماله مسلسلات "العطر، أقارب وثعالب، قلوب حائرة" والسيت كوم كوميدى.

البرنامج:

اللى عاوزين نقوله أن البرنامج حلو ودمه خفيف، ومعتمد على الفكرة الجديدة فى التقديم، ولازم نشجع كل جديد فى التقديم علشان هو ده اللى هيبقى وهو ده اللى هيشد الناس ويا ريت كل القنوات تبدأ تفكر فى التجديد علشان الناس أكيد هتحس بالملل من كتر ما بتشوف حاجات مكررة، وشخصيات مكررة، لازم دايمًا نفكر بره الصندوق وننطلق ونحترم المشاهد.