The Definitive Guide to Living in the Capital , Cairo , Egypt

على غرار مسلسل الكبير قوي للنجم أحمد مكي واللى كان فيه بطل مطلق بجانب الأبطال الثانيين وكانت الكاميرا دائمًا مركزة عليه..معانا النهاردة برنامج واخد نفس النمط..على قناة كمان جديدة.

قناة (cbc  سفرة) أول قناة مصرية متخصصة فى الطبخ (24 ساعة)..ولو حضرتك مش متابع فيه قناة تانية اسمها (فتافيت) وشعارها هو القناة الأولى والوحيدة لفن الطعام فى الشرق الأوسط وده طبعًا المفروض يتيغير علشان فتافيت مابقتش الوحيدة بقى فيه (cbc  سفرة) المصرية 100 %.

القناة بتاعتنا بـ تعرض برامج كثير علشان ترضي أغلب الأذواق المصرية والعربية وعلى سيرة الذوق لازم نقول أن مافيش اثنين بـ يختلفوا على الشيف الشربينى (الكبير قوي) فكل الناس عارفاه من زمان قوي بأكله الشعبي وخلطاته الجميلة واللى صنعت منه نجم كبير.. لكنه بـ يحاول دلوقت يشتغل بأسلوب مختلف وفكر جديد.

الشربيني ربنا ميزه بحاجة تانية غير أنه شاطر فى الأكل وهى (الكاريزما) اللي خلت كل الناس تحبه من قلبها وتقبله زى ما هو لكنه لم يكتفى بالموهبة والقبول لكنه طور كمان من نفسه فى طريقة صنع الأكل ووسع فى مجاله وبقى يعمل (شرقى وغربى).

المظهر واحد من الأدوات المهمة لأى حد عايز يقدم برنامج فى التلفزيون ومهما كانت شطارتك فى الحياة وفى الحاجة اللي بـ تقدمها لازم كمان تكون شاطر فى اختيار شكلك اللى هـ يشوفه الناس وعلشان كده الشربينى عمل شكل جديد لنفسه..فكل يوم بـ يظهر بشكل شيك هو فعلًا مرتبط بالزى الرسمى للشيفات المعروف عالميًا ومش بـ يغير الزى ده..لكنه بـ يضيف للزي ده ألوان واكسسوارات زى النظارة والساعة وكلها عاملة تناسق مع بعضها ودى حاجة تحسب له بصراحة.

ومن بين الحاجات اللى بـ تبين أن الشيف الشربينى هو الكبير قوي فى (cbc  سفرة) أن برنامجه هو البرنامج الوحيد المباشر واللى بـ يستقبل مكالمات على الهواء..

لو اتكلمنا على البرنامج كشكل يبقى لازم نقول أن الستوديو واجهة مشرفة تليق بالقناة والشيف..فالديكور وطبيعة الإضاءة وأدوات المطبخ الحديثة والمتناسقة مع بعض كل ده بـ يقول أن (cbc  سفرة) قناة ليها خط إنتاج واضح وكبير وقادر على (زغللة عينيك) مش بالأكل بس لكن بالديكور والإخراج المميز اللى عينه دائمًا على إيد الشيف فى كل حركة وده مهم جدًا لأن التقديم مرتبط بطريقة حركة إيد الشيف.. وكمان فى الضحك ما بين الشربينى والمخرج وبالذات لما يفكره بحاجة نسيها فى الفرن والشربينى يضحك جدًا على الهواء وكمان يبان فى تعليقات الشربينى (انت عايز توقعنى..عايز تخلينى احرق الحاجة!)

برنامج الشيف مع الشربيني أكل كلنا ممكن نعمله.. مع أنه طور من أسلوبه إلا أنه لسه محافظ على أصالته وطبع المصريين فى الأكل.