The Definitive Guide to Living in the Capital , Cairo , Egypt

مقدمة لابد منها:

الرجل لو بـ يحب فريق كورة يبقى لازم مراته تهتم بنفس اهتمامته…

الست على فكرة ذكية جدًا مش بس في البورصة لا لكن فى الاجتماعيات..

الرجل دائمًا بـ يحب الضحك.. الضحك بـ يعلى الرغبة فى العيشة الحلوة..

أنت اللى فى إيدك أنك تحركى المياه الراكدة..

والست عندها اللمسة الإخراجية الأخيرة للأحداث..

ده مش كلام دكتور نفسى أو معالج أسرى لاثنين متجوزين دى نماذج من المقولات اللى بـ يبدأ بها دكتور أيمن رشوان برنامجه.. وإحنا جيبنا النماذج دى بالذات علشان عاوزين نقول أن الدكتور أيمن مش بس شاطر فى الطب وبـ يذاكر كويس لكنه كمان إعلامى شاطر وعنده المقدرة على جذب الجمهور.. والدليل برنامج “الدكتور” واللى نجح فى تقديمه وبقى من البرامج الطبية المعروفة دلوقت والناس بـ تتابعها.

الجذب:

يعنى إيه تجذب جمهور؟

صدقونى ده سؤال صعب جدًا مع كثير جدًا من البرامج اللى بقيت منتشرة فى كل المواضيع ومع عادة الإعلام الجميل أن الفكرة اللى تنجح لازم نعمل زيها.. فـ تلاقى برنامج طبى على قناة والناس تفاعلت معاه.. يبقى باقى القنوات هـ تعمل برامج طبية.. هاه الجو دلوقت إيه؟ فـ يقول لك برامج طبخ يبقى يلا نعمل كده.. لكن المهم دلوقت هو جذب المشاهد وبرنامجنا قادر أنه يجذب المشاهد وده راجع لقدرة دكتور أيمن على إدارة حوار جيد فـ تلاقيه بـ يقعد مكان المشاهد العادى وبـ يسأل أسئلة كثير ممكن تخطر على بال المشاهد وكمان بـ يستضيف دكاترة كثير فى تخصصات مختلفة وواضح أنه بـ يختارهم بعناية لأنهم شاطرين فى تخصصاتهم.. وكمان بـ يستعين بصور توضيحية علشان الناس تفهم، يعنى بـ يقدم معرفة كاملة للموضوع.

الدكتور:

زمان كان حلاق الصحة هو الدكتور.. وقبله كان العطار هو الدكتور وكان فيه حد فى القرى اسمه “المجبراتى” وده الرجل اللى بـ يصنع الجبيرة لو حد حصل له كسر لا قدر الله.. لكن مع انتشار المعرفة بدأت الناس دى تختفى وحل محلها الدكتور.. لكن الناس لسه عندها اعتقادات فى الطب الشعبى من أعشاب وقرص بالنحل والعلاج بالعصاية وحاجات كده.. لكن خلينا مع العلم وأهميته وتابعوا “الدكتور”.. تابعوا البرامج الطبية واعرفوا حقائق علمية كثير، معلش إحنا عارفين أنكم هـ تسمعوا مصطلحات كثير بس فى الغالب رشوان بـ يفسرها وبـ يبسط المصطلحات دى للناس.