اختفاء.. نيللي كريم بتودع النكد وبتبدأ رحلة التشويق
اختفاء تشويق رمضان غموض محمد ممدوح مسلسلات نيللي كريم
Mohamed Hamdy
“لسة بوز! لسه في الدموع كنوز!”
جملة قصيرة في إعلان اتصالات في رمضان السنة دي على لسان نيللي كريم، يعرفنا إنها عارفة أن قطاع كبير من المشاهدين زهق من تقديمها لمسلسلات (النكد) والمآسي الإنسانية والمشكلات الاجتماعية. علشان كده قررت نيللي أنها تغير جلدها السنة دي وتقدم لنا مسلسل اعتماده الأساسي على الدراما والغموض والتشويق.
وعلشان هي نيللي كريم مش أي حد. المسلسل كان مليان غموض وتفاصيل.. بيلعب على فترتين زمنيتين مختلفتين تمامًا، وبتقدم نيللي من خلاله شخصيتين متقاربتين لكن بيجمع بينهم سر غريب!
الشخصية الأولى هي شخصية الدكتورة الجامعية فريدة المنشاوي اللي بتقرر تسيب شغلها وترجع مصر علشان تتابع إعلان زوجها السابق (هشام سليم) الروائي الشهير عن روايته الجديدة (اختفاء) اللي بيتهم فيها رجل أعمال شهير (قام بدوره محمد ممدوح) بارتكاب جريمة قتل من فترة طويلة.
ومع اقتراب موعد إطلاق الرواية بتبدا مجموعة من الأحداث الغامضة أهمها اختفاء الكاتب الشهير وحريق في دار النشر. لكن فريدة بتقدر توصل لنسخة من الرواية. ومن هنا بيبدأ الجانب الثاني في المسلسل، وهو استعراض حياة (نسيمة) – بتقوم بدورها نيللي كريم برضه- .. البنت المجنونة اللي عاشت في فترة ما قبل ثورة 1952 وارتبطت عاطفيًا بفنان… ثم بتستمر الأحداث الشيقة.
سيناريو المسلسل محكم جدًا.. متشابك وعميق والكاتب أيمن مدحت قدر يغوص فيه ويسحبنا معاه لأعماق القصة اللي بنجد نفسنا متورطين فيها من الحلقة الأولى. لكن التورط ده كان هيكون ناقص لولا مجهود المخرج أحمد مدحت في توضيح التفاصيل وفك خيوط التشابك بين الأحداث أول بأول علشان نكون دايمًا في الصورة.
لكن على صعيد آخر جايزة أسوأ ماكياج هتكون من نصيب محمد ممدوح اللي ظهوره في صورة رجل عجوز كان مبالغ فيه جدًا، لكنه لم يؤثر على أداء الفنان اللي قدر يتغلب على مشكلة مخارج الألفاظ عنده من رمضان الماضي في مسلسل نحن لا نطفىء الشمس. وبشكل عام ده تعاون جديد بين (تايسون) وبين نيللي كريم اللي سبق وقدموا فيلم (بشتري راجل) قبل كده مع بعض.
هشام سليم وعلى الرغم من قلة ظهوره على الشاشة لكنه قدر يقدم شخصية قوية ومميزة وكانت حاضرة مع المشاهدين طوال الوقت وده شيء يحسب له.
موسيقى المسلسل قوية ومميزة لكن المتابعين من خلال اليوتيوب هيتعبوا جدًا من حذف كتير من المقاطع الصوتية بسبب حقوق الملكية الفكرية. والصراحة الموضوع ده متعب ومتكرر مع كتير من المسلسلات واللي بينسى صناعها أن المتابعة النهاردة على اليوتيوب أصبحت بالملايين وده شيء لازم يتم الاهتمام به.
اختفاء مش أقوى مسلسل في رمضان 2018 لكنه مسلسل يستحق المتابعة وعامل زي جبل الجليد.. اللي ظهر من الأحداث دلوقت أقل بكتير من المستخبي في باقي أيام رمضان.. خلينا نشوف ايه اللي هيحصل!
مقترح
فن وثقافة
شبابيك بتطل على القاهرة.. مشروع فني لتوثيق ملامح العاصمة وقت الغروب
Frames of Cairo القاهرة +4
الحياة في كايرو
