أبلة فاهيتا: كل تفاصيل الحلقة الثانية حصريًا على #كايرو_360
Mohammed Sabry
طبعًا كلنا عارفين برنامج أبلة فاهيتا اللي كان بيتعرض على سي بي سي. وعلى مدار 3 مواسم البرنامج ده أثار جدل كبير في الأوساط الإعلامية وعلى السوشيال ميديا ما بين مؤيد ومعارض. تقريبًا كده زي اللى حصل مع برنامج "البرنامج" اللي قدمه باسم يوسف. وخلال المواسم اللي فاتت استضاف البرنامج عدد كبير من النجوم والفنانين والإعلاميين. وسلط الضوء على كتير من المواضيع المهمة في الشارع المصري، بس بشكل ساخر، زي انتخابات مجلس الشعب والأعمال الدرامية في رمضان ومشاكل التعليم وغيرها كتير من المواضيع المختلفة.
من حوالي شهرين بدأ التحضير للموسم الرابع من البرنامج. وتم تصوير أول حلقة من أسبوع وكان الضيف فيها الملحن عمرو مصطفى، لكن الحلقة لسه ما اتعرضتش. أول إمبارح، الأربعاء 23 نوفمبر، كان ميعاد تصوير الحلقة التانية من البرنامج. إحنا في كايرو 360 روحنا حضرنا التصوير، وجبنا لكم معانا تفاصيل الحلقة الجديدة. تعالوا نبص بصة.
البرنامج بيتصور في مسرح راديو بوسط البلد. الدخول بيبدأ حوالي الساعة 8 مساءً. دخلنا الاستراحة اللي بره المسرح الناس كانت مبسوطة وبتتصور مع بوتريهات الأبلة وكارو اللي في كل حتة. وكان من ضمن الجمهور اللي بيحضر الحلقة الفنانة هنا شيحة، والفنانة تارا عماد، والإعلامية سمر يسري مقدمة برنامج "سمر والرجال".
الفقرة الأولى
بدأت الأبلة أول فقرة بمجموعة من آخر الأخبار واستطلاعات الرأي في الشارع المصري. وعرضت فيديو ساخر جدًا للمقطع المنشور مؤخرًا للفنانة فيفي عبده والفنان كمال أبو ريا من مسلسل "طائر الحب". وكمان عرضت فيديوهات من برامج التوك شو عن الشيخ ميزو وادعائه أنه المهدي المنتظر.
الفقرة الثانية
أما الفقرة التانية من الحلقة اتكلمت فيها الأبلة عن الطاقة الإيجابية وإزاي نسخرها لتحقيق أهدافنا. وعرضت تقرير كانت مستضيفة فيه الدكتورة "أمل محسن" الاستشارية النفسية. اتكلمت عن أحسن طريقة لتجنب أي مشاعر أو طاقة سلبية، والتركيز على كل حاجة حلوة في حياتنا.
بعد كده استضافت مدربة يوجا الضحك "يوتا"، اللي اتكلمت عن نوع جديد من اليوجا بيعتمد على الضحك. واستعانت بجمهور الحلقة في تقديم بعض التمارين.
فيه فقرات تانية مش عاوزين نحرقها عليكم ونسيبكم تستمتعوا بالبرنامج.
ماتنسوش البرنامج بيتعرض يوم الجمعة على قناة سي بي سي الساعة 10 مساء. ويك إند سعيد.
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
