-
عائليكوميدي
-
من الآن
Rehab Loay
“تعالى.. روح.. صاحب.. اخرج.. العب.. ذاكر.. انجح، اضحك.. ارقص..
اطلع.. انزل، عيش.. شجع أهلي.. شجع زمالك.. شجع مصر.. اعمل كل اللي نفسك فيه،
أقولك.. اصطاد بط وخليك معانا في آخر الخط”، بالكلام ده بدأ أحمد يونس
مذيع نجوم إف إم الشهير برنامجه الجديد «آخر الخط» على قناة التحرير. ورغم أنه
كلام غريب شوية وفيه حاجات مش مفهومة ومش مرتبطة ببعضها، لكنه في النهاية ممكن
يفهمك طبيعة البرنامج المتنوعة وكل فقراته وموضوعاته اللي تخص الشباب في المقام
الأول، وبـ يقول بصورة غير مباشرة أنه برنامج من الشباب ولهم.
البرنامج غير تقليدي أبدًا، وده واضح في
كل فقراته وفي أسلوب التقديم، وفي الموضوعات المختارة للمناقشة، ممكن نقول أنه
برنامج شبابي، أحمد يونس مُصِر فيه على فكرة “صيد البط”، فـ
تلاقيه دائمًا يقول: “أقولك اصطاد بط وخليك معانا في آخر الخط”، طبعًا
ما كانش حد فاهم اشمعنى صيد البط، لكن اتضح أن يونس نفسه مش فاهم حاجة، وعن الكلمة
دي بـ يقول: “ما أعرفش قلت الكلمة ليه ولا معناها إيه، لكن اكتشفت أن في
حياتنا صيد كثير، وإحنا تم صيدنا لفترة طويلة وقررنا أننا نكتفي بهذا القدر، وأننا
تم صيدنا واصطيادنا والدور علينا نصطاد، كل يوم أحد وثلاثاء هـ نصطاد، وإحنا كبرنامج
حابين يخرج مننا كلام كويس”.
يونس كان صريح من الحلقة الأولى، وقال
أن الفيسبوك هو المصدر الأول للبرنامج وفقراته وموضوعاته. بما أن مصر هي صاحبة المركز
الأول في الوطن العربي في استخدام الفيسبوك -لأن فيه 26 مليون مستخدم له في مصر فقط-
لذلك يعتبر الفيسبوك هو المصدر الرئيسي لأخبار البرنامج غير التقليدية. يعني مثلاً
ممكن تلاقي في البرنامج خبر عن لوحة من لوحات وزير الثقافة الأسبق فاروق حسني وهي منتشرة
في النت والناس كلها بـ تضحك منها ومن غرابتها، وممكن تلاقي خبر عن فرح كيت ووليام
في بولاق الدكرور، وغيره وغيره من حاجات تضحك ودمها خفيف على الفيسبوك بـ ينقلها
يونس بلباقة لشاشة التليفزيون، وبـ يسمح للناس أنهم يشاركوا في صناعة الخبر وأنهم
يقولوا رأيهم فيه.
طريقة إعداد البرنامج مش زي
باقي البرامج، كمان الضيوف والأخبار والمناقشات غير تقليدية، والتواصل مش على
التليفون بس، لكن كمان على الفيسبوك والتويتر، ده غير التصوير الخارجي، ويونس
ناوي يعمل من خلاله حملات ومبادرات علشان يبقى برنامجه مش آخر الخط بس، لأ وكمان
أول الخط لكل واحد عايز يبدأ فكرة أو حاجة كويسة بما أننا كلنا بـ نقول هـ نعمل
ونصلح، وقلما حد بـ يعمل حاجة.
البرنامج جيد جدًا لأي حد مش بـ
يستخدم الفيسبوك، ومحتاج برنامج فيه مضمون وفي نفس الوقت خفيف ومافيهوش قضايا
ثقيلة وموضوعات معقدة، لكنه ممكن يكون ممل للشباب غير المتابعين للتليفزيون ومتعود
يقعد على الإنترنت، يمكن الحسنة الوحيدة له في البرنامج هي أسلوب أحمد يونس، ناس
كثير جدًا بـ تحبه وبـ تحب تتابعه.
أوقات إذاعة البرنامج كل يوم أحد
وثلاثاء، والخميس الساعة 7:30 مساءً على قناة التحرير، تردد 10949 رأسي على النايل
سات، وللتواصل أثناء إذاعة الحلقة دي الأرقام 09000377 أرضي، و5977 محمول.
