The Definitive Guide to Living in the Capital , Cairo , Egypt

كل سنة حلويات رمضان بتاخد المنافسة لمستوى أعلى، والسنة دي نا نجرب “بيستاشيو” اللي لفت انتبهنا قائمته، واللي فيها توليفات جريئة، وميكس بين الشرقي الأصيل واللمسة العصرية، وأصناف معمولة عشان تبقى نجمة السفرة قبل ما تتصور حتى. إحنا في كايرو 360 قررنا نجرب المنيو الجديد بالكامل، ونقول لكم إيه اللي يستاهل يتحط في عزوماتكم، وإيه اللي يتاكل شيرنج مع العائلة أو الأصحاب علشان التجربة تكمل.

كنبوسة بيستاشيو – 120 جنيه

مزيج خيالي بيجمع بين أصل البسبوسة المصرية، وقرمشة الكنافة، مع طبقة غنية من التشيز كيك الكريمي، كل ده متغطي بطبقة من كريمة الفستق وغزل البنات، بطعم خرافي وتوليفة ذكية هتخليكم تحكوا عنها روايات في كل عزومة.

ليالي كنافة بطعم شوكولاتة البندق – 80 جنيه

لعشاق الميكس الكلاسيكي المضمون، كنافة مقرمشة بتخفي جواها حشوة ناعمة من كريمة البندق مع الشوكولاتة، جودة المكونات وتناغم الطعم في الوصفة دي هيخلوكم تستمتعوا بكل قطمة، وبنقول عليها “تجربة جذابة ومميزة جداً”.

بقلاوة كريمية (رويال كلاي سولو) – 85 جنيه

لو بتدوروا على تجربة حلو مختلفة، الطاجن ده هو الحل الأكيد، طبقات بقلاوة رقيقة جداً، محشية كريمة غنية، ومزينة بفستق حلبي فاخر، وشوية عسل بسيط آخر الطاجن، والمميز إنها بتتقدم في طاجن فخار بيديها طابع رمضاني أصيل.

ملحوظة: إحنا جربناها باردة وكانت حكاية، بس بننصح جداً بتسخينها قبل الأكل عشان تستمتعوا بنكهة الفخار الدافية مع الكريمة.

كنافة بلورية بالمكسرات – 84 جنيه

قطعة فنية تستحق يتقال فيها أبيات شعر، جودة المكسرات واضحة وصريحة، وطعم الكنافة البلورية المضبوط بياخد العقل، وبيمثل الجودة العالية اللي بيستاشيو بيلعب عليها السنة دي.

بسبوسة مكسرات – 38 جنيه

قطعة بسبوسة دائرية مطهية بعناية فائقة، متزينة بحبات البندق، أكتر حاجة بتميزها إن سكرها مضبوط جداً “على الشعرة”، يعني هتحسوا بطعم البسبوسة والجودة من غير أي إحساس بالجزعان.

صينية حلويات شرقية عائلية – 365 جنيه

الاختيار المثالي لعزومات رمضان. الطبق ده عبارة عن تشكيلة ممتازة بتضم “بسبوسة سادة – كنافة سادة – أصابع بقلاوة بالكاجو – كل واشكر بالمكسرات – قطعة عش بالكاجو”، ورغم إن الصينية حجمها عائلي وتكفي عزومة محترمة، إلا إن طعمها كان خفيف ورايق، وسكرها معتدل جداً، صفقة ممتازة من حيث التنوع والكمية والسعر.

تقدروا تعرفوا أكتر عنهم من خلال موقعهم الالكتروني من هنا.