The Definitive Guide to Living in the Capital , Cairo , Egypt

كثير مننا بـ يشوفوا الطبخ –والأكل بشكل عام– من أحلى متع الحياة، خصوصًا لو كنت بـ تعمل أكل لحد بـ تحبه؛ مهما كان الموضوع لطيف، أنك تخترع وصفة أكل جديدة أو تجرب تطبخ أكلة من الصفر ممكن يحبطك خصوصًا في بلد زي مصر، أصل أنك تلاقي مكونات الأكل المطلوبة كأنك بـ تدور على إبرة وسط كوم قش.

زي ما بـ يقولوا الحاجة أم الاختراع، ومن هنا قررت مجموعة من أربعة شباب من رواد الأعمال المتحمسين –وهم برضه مؤسسين أريكة بين باجز – ariika Bean Bags– يعملوا مشروع إيزي بان – Easy Pan، وهو عبارة عن خدمة توصيل وصفات الطبخ ومستلزماتها، بحيث يقدموا تجربة طبخ مختلفة تمامًا ويوفروا كل من وصفات ومكونات أكلاتك المحببة لغاية باب بيتك.

إيزي بان ببساطة هي خدمة هدفها تسهيل عملية الطبخ في مصر وتنفيذ أطباق لذيذة في البيت، وده عن طريق توفير مكونات الأكل بكمية صحيحة ومعيارها مضبوط وبـ يكون معاها كروت بسيطة وسهلة الشرح بـ تساعدك في كل خطوات الطبخ.

وقال لنا شاهر أرسلان، واحد من مؤسسين المشروع: "هدفنا هو تقديم وصفات ومكونات أكل لعملائنا تكون جديدة ومبتكرة ومش هـ يقدروا يلاقوها في القاهرة، حتى لو قدروا يوصلوا لها فغالبًا مش بـ يعرفوا يستخدموها، وهنا ييجي دورنا أننا نساعدهم".

موقع إيزي بان الإلكتروني فيه وصفات مبتكرة من مطابخ مختلفة من كل أنحاء العالم ومنها فرنسا وإنجلترا وأمريكا وآسيا وإيطاليا والمكسيك وغيرهم، وكمان المنيو بـ تتغير شهريًا، وده معناه أن المكونات اللي هـ توصل لك دائمًا بـ تكون طازجة وفي موسمها.

منيو نوفمبر شملت اختيارات متنوعة تناسب كل الأذواق، ومنها فيليه بقري بمكرونة ريجاتوني (50 جنيه)، وفيليه رومي بالقرع المهروس (40 جنيه) وسلامون بالفستق (60 جنيه) وفراخ مقرمشة (40 جنيه).

فريق طبخ إيزي بان الموجود وراء الكواليس –واللي كمان بـ يختاروا الأطباق شهريًا- بـ يعملوا عدد من الخطوات قبل ما يستقروا على وصفة الأكل، بداية من البحث واختبار عينات من الطبخة لغاية التعامل مع موردين محليين وعالميين علشان يتأكدوا من الحصول على أفضل جودة ممكنة لمكونات الأكل، وكل ده علشان عملائهم يستمتعوا بتجربة طبخ ممتعة.

كل مكونات الأكل من إيزي بان بـ تكون مغلفة وبـ تتوصل في عربية مجهزة بنظام تبريد يحافظ على الأكل طازج.

أكيد قرائنا الأعزاء لاحظوا أن قسم المطاعم في كايرو 360 هو أكثر واحد فيه شغل، والسبب أن مافيش حاجة أكثر من المطاعم في القاهرة، فأكيد محرري الأكل عندنا ما كذبوش خبر وجرّبوا عبوة إيزي بان، التجربة كانت هايلة بصراحة، الأكل وصل طازج زي ما وعدونا، وكل المكونات المطلوبة كانت مغلفة والتجربة بشكل عام كانت متكاملة: أكل حلو ومكونات طازجة ووصفة سهلة التحضير.

تقدري تعتبري "إيزي بان" هو صديق مطبخك الجديد.

بالهنا والشفا!