The Definitive Guide to Living in the Capital , Cairo , Egypt

على قد ما عجبنا المكان بكل تفاصيله، على قد ما اتضايقنا
أنه مش واخد حقه في الدعاية ومعرفة الناس به. «هوم سنتر – Home Center» عبارة عن مول داخل مول؛ مدينة
البارون هي مدينة سكنية على الطريق الدائري في المعادي جنب نادي الصيد، وفيه مجمع
تجاري كبير خاص بالمدينة، داخله مبنى ضخم مكون من 3 طوابق مكتوب عليه بلون أخضر
مضيء «Home Centre». لو ما لمحتش المول وأنت على
الطريق السريع من بره، أكيد هـ تلمح مبنى «النساجون الشرقيون» العملاق اللي جنبه
على نفس الصف، هـ تهدي السرعة ساعتها وتدخل أول يمين من بعد المول وترجع في الطريق
البطيء اللي آخره مدخل مدينة البارون والمول.

المكان مقسم بتنظيم شديد، الدور الواحد مساحته كبيرة ومقسم
على شكل أركان، كل ركن بـ يبيع أحد لوازم البيت، من أول غرف النوم والمفروشات لحد
الشاليمو بتاع العصير مرورًا بكل أشكال الديكورات والإكسسوارات ولوازم المطبخ.
الدور الأرضي فيه الديكورات والأباجورات وتابلوهات الحائط، كل الموديلات مودرن
وأشكالها غير تقليدية، أكثر حاجة عجبتنا كانت الأباجورات اللي بـ ستاند على الأرض
وبأسعار من 170 لـ 270 جنيه، وفيها أكثر من لمبة بـ تتحرك بأذرع منفصلة عن الستاند
الرئيسي، وفيه مجموعة ثانية من الأباجورات لغرف النوم والريسبشن بتصميمات عصرية فريدة
مش شبه أي حاجة في أي مكان ثاني ودول أسعارهم من 500 لـ 800 جنيه. تابلوهات
سيريالية وتكعيبية ونقوش بارزة بأحجام وألوان مختلفة تليق على كل موديلات الديكور
اللي في بيتك بأسعار من 50 لحد 2000 جنيه، وساعات حائط وحليات ستائر وبطاطين وتشكيلات
من اللحاف والمخدات وأدوات مطبخ وأطقم صيني وتيفال وميلامين وفخار (عجبنا طقم شاي
بالصواني والبراد لقينا سعره 1169 جنيه) وحاجات ثانية كثير من اللي بـ تبقى محتاجها
في البيت ومش عارف دي بـ تُباع فين أو اسمها إيه. والمكان مناسب جدًا لتجهيز
الفنادق والقرى السياحية والفناء الخارجي للفيلات والنوادي، فيه ركن خاص للحاجات
دي.

الدور الثاني مخصص للموبيليات، أنتريه وسفرة وركنات
وترابيزات وكراسي جلد مستقلة وكراسي مساج وغرف نوم. وأنت بـ تتمشى في الدور ده هـ
تلاقي كل غرفة سواء ريسبشن أو غرفة نوم مصممة بعناية ومهندس ديكور شاطر قوي اللي
موزعها ومختار الإكسسوارات اللي فيها بشكل مغري يخليك عاوز تشتري الغرفة كلها، لكن
طبعًا سعر كل قطعة لوحدها مش قليل، ورغم أن فيه تخفيض 50% على كم كبير من
المعروضات، إلا أن الأسعار لسه غالية، ورصدنا بعض المعروضات بسعر أغلى 25% من
محلات ثانية بره، صحيح العرض هنا شيك ومغري، لكن فرق السعر يخلينا لازم نتأكد أن
الحاجة اللي هـ نشتريها من هنا مش هـ نلاقيها في أي مكان ثاني.

في الدور الثالث فيه موبيليا كلاسيك وستيل لكن مش بنفس
مستوى الموديلات المودرن في المول، يمكن أكثر حاجة عجبتنا هنا كانت عربية الشاي
الصغيرة (695 جنيه) وقطعة واحدة عبارة مكتبة وستاند لشاشة LCD ودي كانت بـ 4515 جنيه.

مش هـ نقدر نكتب عن كل حاجة شفناها لأن المعروضات فعلًا
كثير ومتنوعة بطريقة مفرحة، يعني فعلًا محتاجين أكثر من زيارة علشان نأخذ وقتنا في
الفرجة على كل ركن بتمعن. الخدمة جيدة والموظفين بـ يكونوا قريبين منك لو احتجت
مساعدة لكن عمرهم ما بـ يتدخلوا إلا لو أنت طلبت منهم حاجة. شعار «هوم سنتر» هو
“اكتشف منزلك الرائع من خلالنا” وهو معبر جدًا لأن فعلًا لو خيالك واسع
هـ تقدر تكون لوحة فنية بديعة في بيتك وكله من معروضات «هوم سنتر».