The Definitive Guide to Living in the Capital , Cairo , Egypt

“نيللينز – Nillens” فى الزمالك بـ يمثل متنفس حقيقى هائل لبيع المنتجات القطنية المصرية المصنعة محليًا وسط مملكة من محلات المفارش والبطاطين اللى مالية القاهرة.
مكانه موجود فى الدور الأرضى من مركز دجلة فى شارع حسن صبرى، وأول حاجة شدتنا لنيللينز كانت رائحة البخور العطرى اللطيف اللى بـ ترحب بك من لحظة دخولك. المحل يعتبر صغير إلى حد ما، لكن منظم كويس؛ ألوان هادئة وبضاعة مرتبة بعناية، واستقبال يفتح النفس.

أكثر المنتجات الموجودة عند نيللينز هى الملايات. تقدر تلاقى مجموعة من الأشكال، والألوان، والأحجام والمقاسات؛ تصميمات لأشكال ورود، وألوان مبهجة، وكمان ألوان رزينة، كل ده موجود عندهم. الأسعار غالبًا بـ تعتمد على حجم السرير، والأطقم والخيارات المتاحة من عدد الخيوط هى 400 و300. أغلى حاجة ممكن تشوفها على سبيل المثال ثمنها 1000 جنيه، وفى نفس الوقت تقدر تلاقى ملايات لسرير مفرد سعرها 250 جنيه؛ بعد كده الأسعار بـ تتنوع بين السعرين دول.
نيللينز كمان بـ يقدم  حاجات ثانية زى مخدات (190 جنيه للحجم الكبير) بمجموعة من الألوان، بنطلونات مريحة (100: 135 جنيه)، وتي شيرتات (80 جنيه) وبيجامات جذابة (120 جنيه)، والأخيرة دى مغلفة بكيس قطنى لطيف من نفس الشكل. عندهم كمان أحجام متنوعة من الكليم (60: 150 جنيه)، ودى عبارة عن سجادة خفيفة مصنعة يدويًا بألوان روشة وهى مصرية الأصل.

شنط التعبئة الخاصة بالمحل تستحق الإشادة برضه، نظرًا لجودتها، وشكلها الجمالى والأهم من كل ده أنها عملية. أكثر حاجة شدتنا ومش قادرين ننساها كانت شنط تغليف البيجامات.
نيللينز بـ يقدم تجربة تسوق لطيفة ومفيدة. من الواضح أن المحل بأكمله مع المنتجات المعروضة، تم اختيارهم بمنتهى الحرص. الأسعار بـ تختلف بشكل كبير، لكن لو فيه حاجة واحدة بـ يثبتها نيللينز، هـ تبقى أنك تقدر تلاقى حاجة فى حدود ميزانيتك من غير التضحية بعنصر الجودة.