The Definitive Guide to Living in the Capital , Cairo , Egypt

مدينة نصر تحولت نوعًا ما لسوق كبير لمستلزمات الأطفال وملابسهم ولعبهم، خاصة فى شارع عباس العقاد. أي حد له رِجل في المنطقة هـ يحس بكده. مش هـ يفوت محل أو اثنين على صفين الشارع
إلا وهـ تلاقي محل لعب أو ملابس أطفال، ده غير الشوارع الجانبية المتفرعة من شارع
عباس العقاد والقريبة من «جنينة مول».

محل جديد بـ نتوقع يكون له شأن في السوق قريبًا هو محل «ماما نونا»
المتخصص في الحاجات اللي ذكرناها بالإضافة لبعض المفروشات والهدايا وملابس السيدات
الحوامل. والمحل هـ يبقى مميز بسبب حجمه الكبير (3 طوابق) والكمية الضخمة من
البضائع المعروضة.

من الخارج المحل واجهته كبيرة وأضوائها تزغلل العين، وفيه فاترينة عرض فيها
حاجات بسيطة لا تعبر عن المعروضات الكثير جدًا اللي داخل المحل. ورغم أن الافتتاح
تم إلا أن مازال فيه تجهيزات وتشطيبات شغالة في المحل وفيه قطاع كامل في الدور
الأرضي مغلق ومش فيه أي بضائع، وحتى كروت المحل والدعاية الخاصة به تحت
الإعداد.

الدور الأرضي شبه فاضي، فيه الكاشير فقط وكاونتر زجاجي لعرض إكسسوارات
وحلي للهدايا بأسعار من 15 لـ 50 جنيه وبعض الدباديب والعرائس بأحجام عملاقة
واخدة كل الأرفف تقريبًا.

الدور الثاني مخصص لملابس الأطفال وحديثي الولادة وكل أدوات البيبي بداية من
البيبرونة والعضاضة لحد الشيالات وعربية الأطفال. الملابس بمقاس زيرو متوفرة
بموديلات كثيرة للأولاد والبنات، للبيت وللخروج وفيه خامات مختلفة وأسعار تناسب كل
الميزانيات. يعني ممكن تلاقي سالوبيت بـ 50 جنيه وممكن تلاقي بـ 150 جنيه وأكثر.
كل موديل مكتوب عليه السن اللي المفروض يلبسه بالضبط، ومش هـ نقول لكم طبعًا قد
إيه الملابس دي مغرية لأي أم أو أي سيدة منتظرة مولود، وممكن يتجننوا من رقتها
وحجمها. نفس الكلام لمستلزمات البيبي وفيه أطقم كاملة من ماركة Domybear فيها فرش شعر ولعب وكوبايات بسعر 325 جنيه، وممكن
تشتري كل حاجة بشكل منفصل، لكن المجموعة الكاملة أوفر طبعًا. أغطية أطفال ولفات
وملابس بـ تتقفل بأربطة علشان ما توجعش رأس البيبي واختراعات كثير هناك. عربيات
الأطفال بأسعار من 600 جنيه لحد 1700 جنيه حسب حجمها وخواصها، وفيه عربيات التوأم
وكراسي التثبيت بالعربية وشيالات للأطفال وفيه أكثر من موديل تختار منهم. وفيه بعض فساتين الحمل
والسالوبيت للسيدات بأسعار 300 جنيه وأقل، فيه ملابس بناتي لحد أعمار 12 سنة لكن
موديلاتها غير مشجعة على الإطلاق.

دور كامل للعب الأطفال هو الدور الثالث، لكن اللعب مش كثيرة ومش مغرية قوي،
كلها ألعاب تقليدية زي المونوبولي (80 جنيه) وأطقم العساكر وأدوات الطبيب والنجار
والميكانو، يعني مافيش مقارنة بينه وبين أي محل لعب كبير نعرفه. يمكن أجمل حاجة في
الدور ده هي السكوتر اللي بـ يتشحن بالكهرباء بأحجام مختلفة وأسعار من 1300 جنيه
لـ 3000 جنيه. وسيارات الأطفال اللي بتمشي بالبنزين أو بالكهرباء بسعر 4000 جنيه.
وألعاب البحر ومدافع المياه (18 جنيه). شوية حاجات ممكن ما تلاقيهاش بسهولة في أي
حتة.

بـ نتوقع أن «ماما نونا» يكتسب شهرة كبيرة وسط محلات مستلزمات الأطفال، وهـ
يبقى له زبائن دائمين طول ما هو محافظ على خاصيته وهي تنوع الأذواق والأسعار.
الزيارة واجبة على أي أسرة عندها أطفال أو منتظرة حادث سعيد.