The Definitive Guide to Living in the Capital , Cairo , Egypt

العطور دائمًا مصدر البهجة والتفاؤل.. فى المناسبات السعيدة بـ نقدم هدايا أو بـ نكمل بها فرحتنا، وفيه دراسات بـ تقول أن استخدامنا  للعطور بـ يخلينا أكثر نشاط وحيوية.. وزى ما العطر مهم بالنسبة لكل رجل وست، كمان زجاجة العطر مهمة جدًا زى العطر بالضبط خصوصًا لو كنا هـ نقدمها هدية لشخص عزيز علينا.

“ماء الذهب” فرع ميدان طلعت حرب بوسط البلد مش مجرد متجر عطور عادى لأنه بـ يقدم كل أنواع العطور العالمية وتصميمات مبتكرة لزجاجات العطر تناسب كل الأذواق وكمان بـ يقدم عروض شهرية على مجموعة من العطور وزجاجات العطر وكمان قبل ما نختار العطر المناسب.

العاملين فى “ماء الذهب” هـ يعرفونا قصة كل عطر ومعنى اسمه وكمان خامات تركيبه وهـ ينصحونا بالعطر المناسب لنا و هـ يعرفونا الأوقات المناسبة لكل عطر وده لأنهم متخصصين، وكمان هناك فيه عطور منزلية يعنى نقدر نعطر بيوتنا بعطر خاص بنا بعيدًا عن العطور التقليدية وممكن تختارى لكل غرفة العطر اللى يناسبها بمساعدة “ماء الذهب”.

أول ما دخلنا فرع “ماء الذهب” فى طلعت حرب بصراحة تفاجأنا بفخامة المحل بالرغم من صغره وفخامته ما كانتش فى التصميم قدر ما كانت فى فوارغ العطور اللى عارضها الفرع وتكاد تكون مغطية الحوائط من السقف حتى مسافة قريبة من الأرض ومن جمالهم احتارنا فى الاختيار لكن العاملين فى المكان ساعدونا فى الاختيار.

أما من ناحية الأسعار فهى حسب نوع العطر والكمية اللى إحنا عاوزينها والكمية بـ تكون بالمللى، يعنى بـ تبدأ الأسعار من 40: 3000 جنيه وده بـ يتوقف كمان على نسبة التركيز. أما أسعار الفوارغ فهى بـ تبدأ من 20: 200 جنيه، وكل فارغة (زجاجة) بـ يكون لها اسم معين وكل شهر بـ يكون فيه عرض مميز، يعنى مثلاً عرض الشهر ده عبارة عن زجاجة عطر من اختيارك 100 مللى عند شراءك بقيمة 250 جنيه وزجاجة عطر 50 مللى عند شراءك بقيمة 150 جنيه وزجاجة عطر 30 مللى عند شراءك بقيمة 100 جنيه.

ومن أجمل العطور اللى بـ ينصح ماء الذهب المرأة العربية باقتنائها عطر “سى” الجديد من جورجيو أرمانى و”سى” بالإيطالية تعنى “نعم” بالعربية وهو عطر موجه للأنثى القوية الحرة اللى بـ تشعر بالاستقلال وبـ يتركب العطر من زهرة السوسن وأوراق العنب وورد باتشولى وسعر الـ 30 مللى من سى (40 جنيه).

وإحنا طلبنا عطر “لافى بيل” وهو بالفرنسية “الحياة الجميلة” والعاملين بالمحل قالوا لنا عن العطر ده بـ يشعرنا بالحيوية والنشاط وممكن جدًا يكون سبب فى تغيير مودنا من الملل إلى الانطلاق والسعادة وهو عطر أنثوى جذاب وبـ يتكون من: عنب أسود وإجاص وزهرة السوسن والياسمين.

وطبعًا مش كل العطور الموجودة فى “ماء الذهب” تركيب فى كل العطور العالمية الجاهزة، ومن العطور اللى بـ ينصحوا بها الشباب عطر “إينفكتوس” من باكورا بان وهو عطر شبابى منعش وقوى معناه باللاتينية “البطل الذى لا يقهر” وبـ يتكون من جريب فروت وماندرين وورق عنب وياسمين وباتشيلى، والزجاجة الخاصة بالعطر ده على شكل كأس.

والجميل أننا لما نروح “ماء الذهب” مش هـ نشترى عطر وبس، إحنا هـ نعرف حاجات عن العطور هـ تفرق كثير فى اختياراتنا للعطور وكمان نصائح مهمة، ومن النصائح اللى عرفناها لما روحنا كانت: أن الفتيات صغيرات السن يناسبهن العطور المكونة من الزهور أما النساء يناسبهن العطور الأثقل.