The Definitive Guide to Living in the Capital , Cairo , Egypt

محبي الفضة
من السيدات والرجال كتير، وتلاقيهم بـ يفخروا بـ قطعهم المميزة اللي بـ تعبر عنهم.
فان كنت واحد منهم وبـ تعبر عنك الفضة الإيطالي، التركي، المصري أو حتى البدوي،
وكنت في مدينة نصر هـ تحب تزور «لو برنس – Le
Prince».

«لو برنس»
قريب جداً من النادي الأهلي، في الشارع الموازي لحسن المأمون في إتجاه أحمد فخري. المحل
صغير بس واضح. وبالرغم من مساحته، إلا انه عارض تشكيلة كاملة وذوقها عالي.

المحل عنده
فضة تركي ومصري وبدوي. وأكتر حاجة بـ تميز المحل عن غيره هو ان كل مشغولة فعلاً مختلفة،
ومش من السهل انك تشوفها في أي حتة تانية، والمشغولات دي مش بس مختلفة، دي ذوقها
عالي وكل خاتم ولا عقد ولا ساعة بـ تبقى هـ تنطق. ودي موديلاتها ما بين الشرقي
الصميم والمودرن شوية. التركي والإيطالي بـ يبقى عيار 925 والمصري 800. للأسف
المصري ماكانش متنوع في موديلاته والفضة كانت فقيرة شوية. والحلقان تشكيلتها
بالرغم من انها شاملة وحلوة، إلا انها كانت مش في نفس مستوى الأعقاد والخواتم. كان
في أعقاد ضخمة بدوي وتركي وعربي في منتهى الروعة. قطعة اخدت قلبنا كانت عقد بدوي
من حجر اللابيس (lapis) الأزرق الزهري المدور وفيها عليقة فيها الألوان
البدوية الازرق والأخضر و الأحمر وقطرها حوالي 5 او 6 سنتيمتر وبارزة حوالي 3
وكانت بـ225 جنيه. وعندهم كمان ميداليات جميلة ومُفتكسة جداً، على شكل، شبشب، وتمساح
… وحاجات تانية جديدة وجمالية.

وكان عندهم
العليقات المدورة المسطحة اللي طالعة مودا بقى لها وقت، وبـ يكون مكتوب عليها
أسماء، مقولات أو أيات دينية، وبـ تكون إما مفرغة بالكامل أو الحروف هي بس
الفراغات. عندهم منها 3 احجام قطر 4، 5 و6 سم وبـ تتراوح أسعارها من حوالي 200
لـ250 جنيه. والجميل انهم عندهم ورشتهم وممكن يعملولك الكتابة اللي انت عاوزها وبـ
تستلمها بعد يومين. وممكن تكون مطلية دهب (بفرق 15 جنيه) لو انت حابب.

الإيطالي
كان اقل من الأصناف التانية وكان إما بالألماظ الفلصو (اللي في الغالب بـ يكون زيركون)،
او سادة وموديلاته كانت ما بين التقليدية والجديدة البسيطة والمودرن.

أسعار
الفضة في «لو برنس» مش وحشة بالنسبة لمحل في مدينة نصر؛ الجرام عيار 800 بـ9 جنيه والإيطالي
والتركي بـ17 أو 18 جنيه وفي حاجات بتـ تباع بالقطعة زي أي مكان تاني. والمكان بـ
يدي خصم لو طلبت لكن مش بـ يرحبوا بالفِصال قوي. والمحل، مع انه في شارع هادي،
عليه رجل طول الوقت. الخدمة مناسبة والقائمين على المكان عارفين شغلهم، لكن مش
مضيافين وودودين بالقدر الكافي.