The Definitive Guide to Living in the Capital , Cairo , Egypt

بما أن شهر رمضان 2024 قرب وكل سنة وأنتوا طيبين، ومن أساسيات الشهر الكريم “التمور”، أو البلح كما نطلق عليه في مصر لأنه بيتم الإفطار بيه بعد الصيام، وبالتأكيد كلنا عارفين الفائدة الصحية والدينية للإفطار على التمور، وزي ما متعودين كل سنة الفترة الأخيرة بيكون فيه مهرجان مخصوص للتمور وهو “مهرجان القاهرة الدولي للتمور” اللي السنة دي بتنطلق نسخته الرابعة على التوالي، ولأهمية الحدث ده لكل محبين التمور هنقولكم على كل اللي محتاجين تعرفوه عنه.

مع قرب دخول شهر رمضان المبارك سنة 2021 انطلقت النسخة الأولى لمهرجان التمور، ونجح المهرجان خلال 3 سنين فاتوا أنه يكون وجهة محبين التمور من كل حتة كل سنة، والسنة دي هتنطلق النسخة الرابعة للمهرجان يوم 28 فبراير وهتسمتر حتى 5 مارس 2024، وهيكون في حديقة الحرية بالزمالك، واللي بالمناسبة عمرها أكتر من 145 سنة.

المهرجان السنة دي واخد شعار “اكتشف تمور مصر”، وهيشارك فيه منتجين تمور من كل أنحاء مصر وكمان بعض الدول العربية على رأسهم “ليبيا – الأردن – السعودية” وغيرهم، ومن المتوقع أن يزور النسخة الرابعة لمهرجان القاهرة للتمور أكثر من 40 ألف زائر، وبيستهدف المنظمين من خلاله مكانة التمور المصرية عربيًا ودوليًا.

المهرجان كمان بيهدف للتعريف بالتمور ودورها في الغذاء الصحي المتكامل، وتعزيز فرص التبادل التجاري، وتبادل الخبرات بين المنتجين والخبراء وصناع القرار، وهيكون فيه خلال مهرجان القاهرة للتمور مؤتمرات وورش عمل ومحاضرات وعروض وفاعليات تراثية ومسابقات وده بخلاف بيع المنتجات من التمور ومشتقاتها والشتلات ومستلزمات الإنتاج.

المهرجان هيكون في حديقة الحرية بالزمالك أمام دار الأوبرا وبجوار كوبري قصر النيل، وهيكون مفتوح للجمهور من يوم 28 فبراير حتى 5 مارس من الساعة 10 صباحًا حتى الساعة 9 مساءً، والدخول مجانًا للمهرجان ولكن الحديقة هيكون سعر الدخول لها 10 جنيهات.

تقدروا تعرفوا أكتر عن المهرجان وتفاصيله من خلال صفحة الفيسبوك من هنا.