The Definitive Guide to Living in the Capital , Cairo , Egypt

رنا شرف

مين فينا مش بيحب الشيكولاتة بالبسكويت؟ أغلبنا بيحبها واتربى عليها، ويا سلام بقي لو مع كوباية نسكافيه أو شاي أو فنجان قهوة، كده يتعدل المزاج فعلًا. مؤخرًا وإحنا واقفين عند الكشك اللي أمام مقر عملنا في كايرو 360، لقينا نفسنا في مواجهة كيت كات، المنتج العالمي الشهير، وكتاكيتو، المنتج المحلي اللي ظهر من سنوات طويلة علشان يكون بديل لكيت كات لكن بسعر أقل بكتير.

قررنا نشتري المنتجين ونجربهم ونفتكر أيام زمان! تعالوا نعرف مع بعض وصلنا لإيه.

كيت كات اسم تجاري غني عن التعريف، عبارة عن بسكويت بالشوكولاتة، ومرتبط بذكريات أجيال اتربوا عليه وكان جزء من طفولتهم، وفي المقابل البراند المصري اللي لا يقل جمال عن كيت كات هو كتاكيتو، وده واحد من منتجات شركات الشمعدان العريقة، ويعتبر برضه مهم لكتير مننا، يمكن لأنه قريب في الطعم من كيت كات، وفي نفس الوقت سعره قليل ومناسب لكتير من المصريين.

في البداية خدنا قطمة من كتاكيتو، كمية الشيكولاتة كتيرة فيه، بغض النظر عن جودة الشيكولاتة نفسها، وطعم الشيكولاتة ظاهر قوي في البسكويت، ومن حيث السعر مناسب إلى حد كبير، اشتريناه بـ8 جنيه. التغليف جميل وجودته معقولة.

جربنا قطمة من كيت كات، الطعم جميل قوي، لكن حسينا إن طعم البسكويت ظاهر أكتر من طعم الشيكولاتة، وبيتميز البسكويت بأنه خفيف قوي ومش مزعج في الأكل، ورغم إن الشيكولاتة خفيفة لكن الحليب ظاهر في طعمها، ومن حيث السعر مانقدرش نقول إنها غالية قوي، لأن المنتج سعره حاليًا 16 جنيه، وده سعر معقول مقارنة بالجودة. التغليف ممتاز ومحتفظ بالشكل التقليدي بتاع زمان زى كتاكيتو.

ورغم إننا ضد المظاهر، لكن مهم نقول إنه من الناحية النفسية، فيه ناس كتير بتحب تشتري كيت كات كنوع من الدلع، لأنها عارفة كويس إن ده منتج معروف اسمه وقيمته، يعني لو هدية هيكون قيم جدًا، ولو وسط ناس هيكون الشكل العام أفضل من كتاكيتو.

الملخص إيه؟

إحنا جربنا المنتجين وحبيناهم هما الاثنين، يمكن لأنهم فكرونا بفترة مهمة من حياتنا.. الطفولة والمراهقة!

نحب نعرف منكم أنتم أنهي منتج هو الأجمل من وجهة نظركم، وإيه ذكرياتكم مع كل منتج!