Cairo 360
القاهرة مليانة أماكن مميزة، وكاو واحد من الأماكن دي، بفروعه المنتشرة في العاصمة، وأخرهم فرع الزمالك، اللي بيقدم زي باقي الفروع منتجات جميلة هتحس إنها خارجة من عالم ألف ليلة وليلة.
كل زيارة لينا لفرع من فروع كاو بنتأكد إن المكان ده مختلف، وعنده رسالة إيجابية، ومش مجرد مكان لبيع الهدايا وخلاص! واتأكدنا من الموضوع ده لما عرفنا إن كاو بيهتم جدًا بتوظيف ناس من ذوي الإعاقة. وإن 13% من الموظفين في المكان من ذوي الاحتياجات الخاصة.
انبهرنا بالمنتجات المعروضة في المكان، وحسينا بسعادة كبيرة وإحنا بنتفرج على القطع الفنية المختلفة، وسعادتنا زادت لما عرفنا إن كاو كمان بيشجع الصناعة المصرية، وبالفعل 60% من المنتجات اللي بيعرضها مصنوعة في مصر.
المكان مؤمن بثقافة التدريب والتعليم، وعلشان كده بيهتم بتدريب غير القادرين على صناعة منتجات جميلة وصديقة للبيئة، وكل قطعة في كاو ليها حكاية.
المكان بيعرض منتجات مميزة ليها قصص خاصة و مختلفة، سواء كانت سجادة مصنوعة يدويًا من الهند، أو مصنوعة يدويًا من أهالينا في أسوان، وهتلاقي قطع فنية بتجسد الفن المعاد تدويره، واللي خارجة من أفقر أحياء القاهرة.
عرفنا كمان إن كاو بيخصص جزء من أرباحه لدعم المحتاجين في مجتمعنا. باختصار نقدر نقول إن المكان بيقدم رسالة من السعادة والعطاء في عالم الهدايا.
أول فرع لكاو كان في مدينة نصر، ومن وقتها والمكان أصبح من أشهر محلات الهدايا في القاهرة، بعدها افتتحوا فرع المهندسين، ومن فترة افتتحوا كشك للف الهدايا بعمر أفندي (كرييتف إيجيبت) في شارع أحمد عرابي، وبعدها فرع في المعادي، والسنة دي كاو افتتح فرعين جدد في الزمالك والقاهرة الجديدة.
علشان تعرفوا عناوين كاو تقدروا تضغطوا هنا.
