“فيرندا – Verànda”.. منتجات فنية مصنوعة يدويًا بكل حب
تسوق شراء هدايا أونلاين فيرندا – Verànda مشروعات فنية في القاهرة هدايا هاند ميد في القاهرة
Cairo 360
جميلة القاهرة، مش بس بمبانيها وتاريخها وأماكنها العظيمة، لكن كمان بناسها، واللي منهم شباب مجتهد، موهوب، بيحب الفن وبيسعى لنشره. ومن المشاريع الفنية المميزة في القاهرة، واللي ظهرت مؤخرًا، مشروع “فيرندا – Verànda” الفني، واللي هو في الأساس فكرة لفنانة شابة اسمها إسراء بدعم جميل وصادق من خطيبها أحمد.
المشروع بالنسبة لنا هو أقرب لقصة حب جميلة، بنتمنى لها الصمود والنجاح.
ولأننا في كايرو 360 بندور دائمًا على الحاجات المميزة علشان نعرفكم عليها، قررنا نقرب أكتر من “فيرندا”.. اتفضلوا معانا!
لما هتدخل الصفحة الرسمية لمشروع “فيرندا – Verànda” على فيسبوك، هتحس بالبهجة والحب، المنتجات المعروضة فيها لمسة جميلة، بتقربك أكتر من الطبيعة، تصميمات على جذوع الأشجار، معمولة بدقة وبألوان مبهجة وبجودة عالية.
المكان بيعمل كمان تصميمات جميلة على الخشب، وتقدروا تطلبوا منهم أي منتج خاص، يعني ممكن تطلبوا رسومات معينة على الجذوع أو على أي حاجات فنية تانية بيقدمها المشروع، زي الماجات والتي شيرتات واللوحات الخشب وأكتر.
المكان بيهتم بدرجة كبيرة بالتغليف، لما طلبنا حاجة من عندهم وصلتنا في تغليف جميل، مع رسالة صادقة وجميلة ومكتوبة بخط حلو!
الأسعار في المكان معقولة جدًا، هتلاقوا منتجات جميلة مصنوعة يدويًا بأسعار بتبدأ من 100 جنيه.
إحنا حبينا أكتر منتجات جذوع الأشجار، يمكن علشان إحنا بنحب الطبيعة أكتر فلما يكون فيه منتج طبيعي زي جذع شجرة مع ألوان مبهجة وثابتة فدي حاجة أكيد هتعجبنا.
هم كمان عندهم أظرف جوابات مصنوعة يدويًا شكلها جميل قوي.
تقدروا تعرفوا أكتر عن مشروع “فيرندا – Verànda” الفني من خلال صفحتهم الرسمية هنا، وتقدروا تشوفوا صور منتجاتهم من هنا.
وممكن كمان تتواصلوا معاهم تليفونيًا على رقم: 01021087372.
