على طريقة Game of Thrones… شركة مصرية لكتابة وتوصيل الجوابات المختومة بالشمع الأحمر
Game of Thrones المنصورة بالشمع الأحمر توصيل جوابات جوابات بخط اليد جوابات قديمة طابع بريد هواة المراسلة
Cairo 360
الجوابات التقليدية بتقدر تنقل المشاعر بشكل أحلى بكتير من الإيميلات.. دي حاجة عارفها كويس كل اللي كان بيبعت زمان جوابات بالبريد وبيكتب عليها شكرًا لساعي البريد.. ياااه كانت أيام جميلة.
ومؤخرًا وعلى طريقة مسلسل Game of Thrones بدأ 4 أصدقاء أول شركة مصرية لكتابة الجوابات، واللي بتقوم بمهمة مختلفة جدًا. عن طريق كتابة جوابات بخط الإيد على نوع خاص من الورق وبيختموها بالشمع الأحمر، وبعد كده بيربطوها بالحبل علشان تبقى شبه الجوابات اللي ظهرت في مسلسل “Game of Thrones ” أو صراع العروش.
بيقول مؤسسي الشركة لموقع اليوم السابع “فكرنا نعمل الشركة عشان فيه ناس مش عارفة تعبر عن مشاعرها فإحنا بنعبر بالنيابة عنهم، وعلشان الجوابات حاجة جميلة مهما مر الزمن ما بتفقدش معناها”.
صاحب فكرة الشركة هو “محمد فوزى” الطالب فى الفرقة الخامسة بكلية طب أسنان المنصورة، بيقول “فكرت فى الشركة من سنة و3 شهور تقريبًا واستلهمتها من وحى مسلسل صراع العروش وفيلم Her، ومن وحى الرسائل التى كان بيكتبها لنا صديقنا الخطاط والتى كانت بتسعدنا جدًا”.
جمع “محمد” فريق عمله من أصدقائه وزملائه بالكلية نفسها ووزعوا الأدوار: “أنا مسئول العلاقات العامة والتواصل، وصديقنا مصطفى ياسر هو الخطاط اللي بيكتب الرسائل أما عبدالرحمن حسين ومحمد كمال فهما المصممين اللي بيحطوا تصور لشكل الجوابات وبينفذوه”.
الشركة بتعمل حاليًا فى 4 مناطق بس هى المنصورة ودمياط وطنطا والمحلة، وبتقوم فكرتها على إعادة إحياء الجوابات القديمة بالورق البنى والختم بالشمع الأحمر.
وأسعار الشركة مناسبة جدًا ورقة الكتابة والظرف بـ 25 جنيه، وفى حالة الكتابة بالحبر الطبيعى بتدفع 10 جنيه أما الإضافات التانية زي لف الجواب بحبل طوله متر فبتكلف 5 جنيه والوردة بتكلف 10 جنيه أما الطابع البريدى فسعره 2.5 جنيه، والتوصيل بيكلف 10 جنيه.
