The Definitive Guide to Living in the Capital , Cairo , Egypt

الشكل
ممكن يكون خادع، مثال حي على كده محل «سمير وليام» الموجود في شارع القبة عند إشارة روكسي، من برة شكله مش أكثر من صيدلية عادية، مع أنه من الداخل عبارة عن محل ضخم
لأدوات التجميل والمكياج وأجهزة العناية بالشعر ووصلات الشعر الطبيعية.

واجهة
المحل مخصصة للمكياج والعطور، تشكيلة ضخمة من ماركات مستحضرات التجميل زي
((كيرولان، بوبا، ايسنس، نيفيا، بورجوا، مافالا، لوريال، لونا، ديبورا وفلوريل) ومن العطور هـ تلاقي ماركات (كيلفن كلاين، ارماني وشانيل). «سمير وليام» عنده
مجموعة صغيرة من سبرايهات (فيكتوريا سيكريت) بسعر 95 جنيه الواحدة. الغريبة أن قسم
المكياج مش أحسن قسم في المحل! أنما كان قسم الشعر وأدواته.

اللي
عرفناه أن «سمير وليام» يعتبر من أهم محلات أدوات ومستلزمات محلات الكوافير في
القاهرة. مخزون ضخم من بكر الشعر والفرشات والسشوار والمكوات والصبغات. الفرشات أسعارها ما بين 30 لـ 50 جنيه، وفيه منها موديلات لجميع أنواع الشعر
وأطواله. لاقينا وسط الحاجات كمان مجموعة من الرموش الصناعية (21 جنيه) ومرايات
صغيرة بـ تنور (17 جنيه). وعلشان المحل بـ يبيع بالجملة هـ تلاقي عبوات الشامبو
العملاقة اللي عادة مش بـ نشوفها إلا عند الكوافير، وماركات زي (جارنير، جون فريدا،
بانتين وحاجات تانية). أسعار العبوات بـ تكون ما بين 100 لـ 200 جنيه.

لو
كنتِ طول عمرك بـ تدوري على جوانتي أو شرابات للتدفئة بالكهرباء (Electric Booties) ومش عارفة بـ تتباع فين احنا
لاقيناها عند «سمير وليام» بسعر 150 جنيه. ودي للي مش عارف بـ تبقى عبارة عن أكياس
قماش يتحط فيها القدمين أو اليدين وتقوم بالتدفئة بالكهرباء وتنعيم البشرة، كمان فيه أجهزة بخار للوجه (195 جنيه) ومجموعة كبيرة من السشوارات ومكوات الشعر
بأسعار السوق العادية، والموديلات من أول 100 جنيه لحد 700 جنيه. 

في
آخر المحل فيه قسم لوصلات الشعر (Extensions) والباروكات. عرفنا
أن الحاجات دي بـ تيجي من الهند اللي تعتبر من أهم مصدرين وصلات الشعر الطبيعية،
سعر الوصلة بـ يكون على حسب الوزن؛ 85 جرام بـ 480 جنيه. وهـ تحتاجي تقريبًا 150
جرام لو عايزة تغيري شكل شعرك تمامًا من قصير لطويل. لو عايزة تطولي شعرك شوية هـ
يكفي من 80 لـ 100 جرام. الباروكات غالية جدًا ومصنوعة من الشعر الهندي برضه
بأسعار من 2000 لـ 5000 جنيه حسب الطول والكثافة.

العاملين
بالمحل متعاونين وفاهمين جدًا، لكن المكان بشكل عام فيه شوية فوضى، وده بسبب زحمة
الستات اللي على طول بـ يجربوا المكياج ووصلات الشعر وبـ يجمعوا عبوات الشامبو. هـ
تقضي وقت مش قليل هناك، علشان تلحقي تتفرجي على كل حاجة.