The Definitive Guide to Living in the Capital , Cairo , Egypt

أحيانًا ممكن إنسان يعمل مشروع مخصوص لمجرد أنه عاوز يعوض حاجة ناقصة في معادلة التسوق في القاهرة، وأسماء عصام واحدة من الناس دول، هي نفسها بتحب الإكسسوارات البناتي، لكنها لاحظت أن القطع الفنية بتكون غالية جدًا، فقررت تدور على طريقة مختلفة توفر بيها إكسسوارات جودتها عالية، لكن في نفس الوقت يكون سعرها معقول ومناسب لكل البنات، وعلشان كدة أطلقت فكرة مشروعها Camillia Accessories، واللي هنحكي لكم حكايته في السطور الجاية.

أسماء عصام هي مؤسسة جروب Camillia Accessories، المتخصص في بيع الإكسسوارات للبنات، وهدفها من المشروع هو نشر رسالة أن كل البنات جميلات وعندهن القدرة على إظهار جمالهن من خلال لمسات خفيفة بيحبوها، وأن لو البنت اختارت إكسسوارتها بحب، فهي نفسها اللي هتحلي أي قطعة إكسسوار مش العكس.

الفكرة بدأت لما “أسماء” زارت معرض ما وعجبها مجموعة إكسسوارات لكنها اكتشفت أن القطع مبالغ جدًا في سعرها، وحست أن فيه استغلال من بعض المحلات خاصةً أن الجودة والحجم ميستاهلوش السعر ده، فقررت تعمل بحث ورا الموضوع وتعرف كل تفاصيله.

وبعد بحث وتدقيق قدرت توصل لمستوردي الإكسسوارات المصنوعة بجودة عالية، وكان شرطها أن كل القطع تكون مصنوعة من خامات كويسة لا بيتغير لونها ولا بتقشر ولا بتضر الجلد، وهنا قررت تطلق مشروعها من خلال جروب على موقع فيسبوك، وبدأت تسوق للمنتجات بتاعتها من خلال معارفها وأصدقاءها، وواحدة واحدة نجحت الفكرة، وبدأ بنات كتير يتواصلوا معاها.

“أسماء” من خلال مشروعها مش بتبيع منتجات وبس، هي بتقعد تختار وتقترح وتتناقش مع كل بنت بكل حب وتساعدها تختار المنتجات الأقرب لشخصيتها، وهي بتقدم خواتم وسلاسل وإنسيالات وحلقان وخلخال وغيرها من المنتجات البناتي المميزة. وأسعار المنتجات عندها مختلفة، بتبدأ من 50 جنيه، وبتصل لـ400 جنيه.

تقدروا تعرفوا أكتر عن Camillia Accessories من هنا.