The Definitive Guide to Living in the Capital , Cairo , Egypt

لو كنت من عشاق القهوة، فأكيد فكرت في يوم تشتري سبرتاية وكنكة وصينية من النحاس علشان تصنع أحلى فنجان قهوة على طريقة أيام زمان، وطبعًا مع الأدوات دي لازم يكون معاك نوع بُن مميز.. في الموضوع ده هنعرفكم على أسعار معدات القهوة وكمان أفضل الأماكن اللي تشتروا منها أحلى كيس بُن.

نقدر نقول إن مناطق شارع المعز وخان الخليلي والجمالية في القاهرة التاريخية، هي أشهر المناطق اللي بيتباع فيها أدوات صناعة القهوة على الطريقة القديمة، زي السبرتاية والكنكة وحتى الصينية والفناجين، لكن مش كل الناس تعرف الأسعار الحقيقية للأدوات دي، خاصة إن بعض البياعين بيقولوا في البداية أسعار مبالغ فيها.

ومهم في البداية نعرف أن أسعار أدوات صناعة القهوة في شوارع الجمالية والمعز وخان الخليلي، وخاصة المصنوعة من النحاس، بتختلف من مكان للتاني، علشان كده مهم قبل الشراء أنك تلف لفة حلوة علشان تعرف كل الأسعار وتقارن وتشوف الأنسب ليك، لكن بصفة عامة بننصحك تشتري من منافذ ورش صناعة النحاس لأنها هي الأرخص والأكثر جودة.

وبحسب تقرير حديث نشره موقع اليوم السابع، فأسعار السبرتاية في مناطق القاهرة التاريخية، بتبدأ من 60 جنيه و 70 جنيه، أما السبرتاية اللي عليها شغل زخارف عالي واللي بيطلق عليها سبرتاية الملكة بيوصل سعرها لـ 280 جنيه ودي بيكون معاها أدواتها كاملة.

أما سعر الكنكة النحاس بيبدأ من 30 جنيه و35 جنيه، والسكرية بـ 25 جنيه والحجم الأكبر منها بيبدأ من 50 جنيه.
وهتلاقوا هناك كمان طقم قهوة كامل، بيتكون من صينية وسبرتاية وفنجان وكنكة، وده سعره بيبدأ من 150 جنيه وبيوصل لـ 300 جنيه، أما الفنجان الصغير فسعره 14 جنيه، وسعر الصينية النحاس بيبدأ من 90 جنيه.

دليلك لشراء أفضل بن في القاهرة
في كايرو 360 سبق ونشرنا لكم دليل عن أشهر 7 أماكن تشتروا منهم بن في القاهرة هتلاقوه في الرابط ده، وهو دليل بيعرض لكم أفضل وأشهر أماكن بيع البن في القاهرة، وأغلبها جربناها بنفسنا.