رمضان 2025.. دليلك لأرخص وأجمل أماكن بيع الزينة في القاهرة!
الخيامية السيدة زينب الموسكي تحت الربع حارة اليهود رمضان في القاهرة زينة رمضان زينة رمضان 2025 فانوس رمضان
Cairo 360
مع دخول رمضان 2025، شوارع مصر بتتحول لكرنفال من الألوان والزينة اللي بتفكرنا بجمال الشهر الكريم. زينة رمضان في مصر ليها تاريخ طويل بدأ من العصر الفاطمي، لما كانت الأعلام القماش بتتعلق في الشوارع، والفوانيس بتنور البيوت والمحلات. ومع الوقت، الزينة اتطورت وبقت من الفوم والبلاستيك والورق، وفيه كمان اللي بيشتغل بالكهرباء!
ولأن زينة رمضان جزء من فرحتنا بالشهر الكريم، جِبنا لكم دليل لأفضل 5 أماكن في القاهرة تقدروا تشتروا منها زينة رمضان 2025 بأشكال متنوعة وأسعار تناسب كل الميزانيات!
1- الخيامية
لو عاوزين زينة رمضان الأصيلة، يبقى لازم تروحوا شارع الخيامية في منطقة الأزهر، ورا مسجد الغوري. هناك هتلاقوا كل أنواع الزينة، خصوصًا المصنوعة من قماش الخيامية والقطيفة، وكمان تقدروا تفصلوا أي تصميم يعجبكم مخصوص.
2- تحت الربع
في قلب باب الخلق، منطقة تحت الربع معروفة إنها أرخص مكان تقدروا تشتروا منه زينة رمضان. هناك هتلاقوا كل حاجة من الهاند ميد لحد المصنوع آليًا، بأسعار حلوة جدًا، وحقيقي هتحسوا إنكم في عالم مليان بهجة رمضان.
3- حارة المزين (الموسكي)
في حارة المزين بمنطقة الموسكي، هتلاقوا زينة رمضان بكل الخامات اللي تتخيلوها، من النحاس والخشب والزجاج، لحد الورق والبلاستيك. والأسعار هناك بتبدأ من 10 جنيه بس، يعني هتلاقوا حاجة تناسب أي ميزانية.
4- السيدة زينب
رمضان في السيدة زينب له طعم خاص، ومع دخول الشهر الكريم، بتتفتح شوادر مليانة كل أنواع الزينة، من التقليدية لحد العصرية، بأسعار متنوعة تناسب الجميع. الشوادر دي هتلاقوها حوالين مسجد السيدة زينب، واللي بيروح هناك عارف إنه مش هيطلع بإيده فاضية!
5- حارة اليهود
رغم إن حارة اليهود في الموسكي والأزهر بتكون زحمة، لكنها كنز لكل اللي بيدور على زينة رمضان بأسعار حلوة. هناك هتلاقوا تشكيلة ضخمة من كل الخامات والألوان، ونصيحة من كايرو 360: متشترِوش من العربيات اللي برة، لفوا جوه المحلات، وهتلاقوا أسعار أرخص بكتير!
رمضان مش بس صيام وصلاة، رمضان فرحة بنعيشها مع كل تفصيلة، وزينة رمضان واحدة من الحاجات اللي بتخلي للشهر الكريم جو مختلف.. فاختاروا الزينة اللي تناسبكم وخلوا بيوتكم وشوارعكم تنور بأجواء رمضان!
