The Definitive Guide to Living in the Capital , Cairo , Egypt

التقليد المصرى بـ يقول أن بدلاً من حفل العزوبية العروسة بـ تعمل ليلة “حنة”، وفيها بـ تلبس فستان، وترقص غالبًا على أغانى مصرية، وتعمل حنة. فكرة حفل العزوبية بشكلها الغربي بدأت تدخل فى عقول العرسان الشباب فى السنين الأخيرة لرغبتهم فى الاستمتاع ببعض من المرح. السؤال دلوقت هو: تلاقى فين منتجات مخصوصة تناسب فكر كل عروسة؟
فكرة الموضوع بدأت عند الأصحاب القدامى، نينا الألفى وندى سليمان -الأولى مصممة جرافيك والثانية فنانة- لما شافوا نماذج كثير من أصحابهم بـ يفكروا فى الموضوع. دائمًا بـ يعانوا فى تنظيم حفلات العزوبية من شراء الأدوات المطلوبة زى  الأحزمة الحريرية فوق الفساتين، وشيلان من الريش، وتيجان وحاجات ثانية، وعادة فى الآخر بـ يضطروا يجمعوا الحاجات دى مع بعضها بنفسهم، أو يشتروها من الخارج. الموضوع مش بس حفلات العزوبية؛ الثنائى بـ يوفر إكسسورات للأفراح وأحيانًا بـ يتعاملوا مع منظم الفرح مباشرة. فى النهاية ونظرًا لأهمية الدور اللى بـ يلعبوه قرروا يأسسوا “ذا نوت – The Knot”.
نينا وندى قالوا بكل فخر: “إحنا بـ نسعى وراء إرضاء رغبات كل فرد على حدة”. بـ يهتموا جدًا بالمقابلة المباشرة مع العروسة علشان يفهموا طبيعة شخصيتها، وعن طريقها يقدروا يضبطوا الحفلة طبقًا لدماغها على قدر المستطاع. المناقشة اللى بـ تحصل فى المقابلة بـ تخلى الحفلة مناسبة ما تتنسيش بالنسبة للعروسة. حوالى 80% من المنتجات بـ تتعمل مخصوص وده يعتبر حجر الأساس فى شغلهم.
المنتجات دى بـ تشمل كل شئ بداية من طرحة تفصيل للعروسة لغاية الأحزمة والتي شيرتات مكتوب عليها عبارات زي Bride to Be، وأشبينات العروسة بـ يحصلوا كمان على تي شيرتات وأحزمة مكتوب عليها عبارات شخصية لهم، بالإضافة إلى رباط للرأس، وورد، وريش وحاجات ثانية. على حسب كلام فريق العمل، هدفهم هو “تقديم الدعم للعرائس”، وتقدر تعتبر منتجاتهم أنها “على أحدث صيحة”، بـ يقسموا مجموعاتهم لجزئين واحدة منهم الربيع مع الصيف والثانية الخريف مع الشتاء. هم مسئولين عن كل وأى حاجة تخص احتياجات العروسة مهما كانت غريبة.
ساعات بـ يُطلب من الفريق تنظيم الفرح نفسه بجانب توفير المشتريات الخاصة بالعروسة. هما في الأساس مش بـ يقدموا الخدمة دى، بس زى ما الثنائى بـ يقولوا بكل بهجة: “لما العروسة تسألنا عن أفكار أو نصائح عن مكان الفرح أو طريقة عمل الديكورات بـ نساعدها وإحنا فى منتهى السعادة”.

التعامل مع العرائس أوقات بـ يكون علاقة حساسة والبنات المسئولين عن “ذا نوت” عادة بـ يجدوا نفسهم متورطين فى حاجات غير تنظيم الحفلة: فستان معيوب، ومشاكلها مع البيت أو مع عريسها اللى بـ يخلوها هـ “تتجنن”، كلها سيناريوهات واردة، بس هما بـ يأكدوا أنهم مش منزعجين. “إحنا بجد بـ نبقى أصحاب مع أغلب العرائس، وعلشان كده مافيش مانع أننا نخرج عن إطار شغلنا المعتاد”، دى كانت جملة خلتنا نسأل سؤال مهم: هل العرائس المتوحشات موجودين فعلاً فى مصر؟ البنات فى “ذا نوت” بـ يأكدوا أنهم موجودين، لكن هما عندهم من الدبلوماسية أنهم يقولوا أن ده جزء طبيعى من الموضوع. “عارفين كويس حجم الضغط العصبى وفاهمين أن نفسهم كل حاجة تبقى مضبوطة”.
رغم أن كثير مننا شافوا شغلهم بـ ينهار بسبب الثورة، من حسن حظ “ذا نوت” أن مجال الزواج عمره ما يتوقف على ظروف أو وقت معين. نفسهم يوصلوا فين فى المستقبل؟ بـ يقولوا أن الشغل توسع ونشر فى مجلة Martha Stewart Weddings الخاصة بالشرق الأوسط وده عمل لهم شعبية فى المنطقة، وبـ يأملوا أنهم يقدموا شغلهم فى دبى.