The Definitive Guide to Living in the Capital , Cairo , Egypt

الظروف لما تتغير من حوالينا لازم نتعايش معاها ونشوف حلول بديلة. وبعد ارتفاع سعر البنزين كل حاجة غليت معاه سواء تاكسي أو مواصلات عادية. وبقينا نخاف حتى نركب عربياتنا، خاصة في المشاوير القصيرة. علشان كده إحنا في كايرو 360 بنشجعك وهنساعدك تشتري عجلة، تقضي بيها مشاويرك. واللي ممكن توصل سرعتها معاك لحد 60 كيلو في الساعة، حسب لياقتك البدنية. وهنعرض عليك الفئة المتوسطة من العجل اللي تناسب كافة فئات المجتمع المصري.

لازم أول حاجة تحدد هدفك، أنت عاوز العجلة في إيه، ومعاك فلوس كام، والطريق اللي هتمشي عليه كويس ولا مكسر. ولو أنت هدفك تقضي مشاوير جوة منطقتك والطرق مش مرصوفة كويس، تقدر تجيب عجلة ماونتن. وده نوع عجل كاوتشه عريض وبيستحمل المطبات والحفر. وكمان فيها مساعدين علشان المطبات. مع العلم أن وزنها ثقيل وبيوصل لـ 17 كيلو كجم. والسعر بيتراوح بين 2600 لحد 3400.

ولو أنت عاوزها في مشاوير بعيدة شوية، وهتمشي في طريق مرصوف نوعًا ما أو فيه رملة، فتقدر تشتري نوع منها بتتميز بخفة الوزن. تقريبًا 10.5 كيلو. وكمان كاوتشها متوسط العرض. وبيدي سرعة أكبر. وتقدر تمشي بها في طرق رملية وترابية أو طرق مدببة. ودي سعرها بيبدأ من 3100 جنيه إلى 5000 جنيه.

كمان عندك عجل الروود، اللي بنشوفه في السباقات. وده محتاج طريق مستقيم ومافيهوش أي حفر أو مشاكل. وبيتميز برفع كاوتشه، اللي مش هتتخيل أن فيه “كاوتش داخلي” من كتر رفعه. وتقدر توصل بسرعته لـ 120 كيلو في الساعة، بس أنت شد حيلك وابدأ. والروود معروف إن أسعاره المتوسطة تبدأ من 4000 جنيه حتى 50 ألف جنيه.

أما منين تشتري وإزاي، لازم تعرف أنك قبل ما تشتري هتعمل بروفة “مقاسات”، ماهي مش سايبة بقى. المقاسات دي ممكن تعملها لنفسك أو عند أي حد هتشتري منه. وده بيكون من خلال أن طولك ووزنك يتناسب مع الشاسيه. وبتقيس طول الأنزيم من خلال “كتاب” بتمسكه بين رجليك، اللي هي منطقة جلوسك على الكرسي. وتبعد رجليك عن بعض 20 سم، وتقيس طولك من المكان ده لحد الأرض. وتضربهم في 0.65. وممكن تستعين بموقع بايكل تول من هنا. واللي من خلاله هتدخل نوع العجلة، وجنسك وطولك بالكامل، وطول الأنزيم، وتضغط على كلمة حساب. وبالتالي هيحسب لك أفضل مقاس لك إيه تشتريه.

العجل ده كله اللي بنتكلم عليه مصنوع من الألومنيوم. ونصيحة أبعد عن الحديد تمامًا، علشان هتكره نفسك. وماتنبهرش بالمنظر، دايمًا العجلة الكلاسيك هي أفضل عجلة. وأشهر أنواع موجودة في السوق حاليًا هي “ترينكس – فورمات” وأسعارهم في متناول الجميع، وكمان صيانتهم سهلة.

لما تشتري العجلة لازم يبقى معاك “عدة” زي مفاتيح وألنكيه ومنفاخ وزمزمية والذي منه. وفي الغالب هتاخدهم هدية من المحل اللي هتشتري منه، علشان لو عطلت أو حاجة. وكمان فيه جروب على الفيس بوك اسمه “منقذي الدراجات الهوائية” تقدر تشوفه هنا. وده تقدر تتصل بيهم لو عطلت وتقول لهم العيب، وبيبعتوا لك حد يساعدك أو يجيب لك قطعة غيار. وبياخدوا على 5 جنيه بس مساعدة للجروب، اللي بيوفر أدوات اللحام والعدة مجانًا للجميع.

وعلشان تقدر تشتري عجلة ممكن تروح شارع رشدي في وسط القاهرة، وتتفرج على كل المحلات اللي هيبقى فيها شباب عاوز يساعدك ويشرح لك كل حاجة. وبعد ما تلف وتدور تختار المحل اللي هتشتري منه، اطلب منه ياخد مقاسك الأول، علشان تشوف العجلة المناسبة لك.

ولو احتجت معلومات أكتر أو مساعدة من شباب بيحبوا العجل وركوبه وبيشجعوه ممكن تدخل على جروب PIRATES BIKES من هنا.

أو جروب Pirates Cyclists من هنا.

والجروبين دول عالم آخر من الحياة، ومن أشهر المتخصصين بكل حاجة في العجل. وكمان ممكن تلاقي عندهم عجل مستعمل يبدأ من 1200 جنيه.

أما لو محتاج مهندس صيانة وخبرة وخدوم، ممكن تتواصل بأشهر وأفضل شخص كابتن جوزيف جورج صاحب “جوزيف بايك ستور” من هنا. والمحل بتاعه ورا الكتدرائية في العباسية، وإحنا شخصيًا بنتعامل معاه.