دليلك للهروب من الضنك.. 5 عادات بيخلوك مفلس دائمًا
تحسين الدخل توفير الفلوس نصائح لتحسين دخلك نصائح للتوفير
Mohamed Sabry
بتمر في حياتنا فترات كتيرة ممكن نعاني خلالها من حالة إفلاس حتى لو مؤقت، أو نضطر نتنازل عن حاجات محتاجينها عشان مافيش فلوس تكفي.
وعلى قد ما بنركز كل جهدنا في طريقة تحسين الدخل، بنغفل تمامًا عاداتنا اليومية في الإنفاق. خاصة إن تحسين الدخل زي ما هو مرتبط بكسب الفلوس، مرتبط كمان بصرفها.
تعالوا نقول لكم على أهم العادات اللي بتخلينا دايمًا مفلسين، حسب ما نشر موقع “mashable”:
إهمال فكرة الادخار أو استثمار جزء من الدخل
في عالم من النفقات المستمرة والرغبات الاستهلاكية المتزايدة، سهل جدًا تقع في فخ إنفاق كل فلوسك، بدون الانتباه لخطر المصاريف المفاجئة أو الظروف الطارئة.
عشان كده الخبراء بينصحوا بضرورة ادخار 15% على الأقل من دخلك، كده هيبقى عندك دعم مالي خاص بالطواريء.
الاستثمار كمان يعتبر وسيلة ممتازة ومضمونة للأمان المالي، سواء في عقار أو دهب أو أي مشروع حتى لو صغير، يكون مضمون ودائم الربح.
الاعتماد الدائم على الكريدت كارد (بطاقات الائتمان)
بطاقات الائتمان بتخلق رغبة قوية في الشراء، بالاعتماد على مبدأ إنك تقدر تشتري اللي انت عايزه وتدفع بعدين.
لكن ده للأسف هيوقعك في دوامة مستمرة من الديون لسداد الأقساط، وأكيد هتفلس في وقت قصير. فضروري جدًا تفكر في مدى أهمية واحتياجك للسلع قبل ما تشتري.
عدم تحديد الميزانية أو إهمال متابعة نفقاتك
بدون خطة واضحة للإنفاق، فلوسك هتختفي في لمح البصر، وتفضل مستغرب ده حصل إزاي.
عشان كده لازم تحدد ميزانية لكل حاجة وتراقب نفقاتك باستمرار، وإلا هتلاقي نفسك بتصرف على حاجات مالهاش أي قيمة، ومش بتوفر جنيه.
اتباع أسلوب حياة إعلى من إمكانياتك المادية
المثل بيقول “على قد لحافك مد رجليك”، وده ينطبق على حجم دخلك والطريقة اللي بتعيش بيها.
يعني لو دخلك متوسط مفيش داعي كل يوم تاكل من أغلى المطاعم، أو تشتري لبس من أغلى الماركات.
لازم تفكر كويس في طريقة حياتك، فمثلًا الأكل تقدر تجهزه في البيت، واللبس تقدر تجيبه من أماكن معقولة بأسعار مناسبة، وهكذا الخروجات والفسح
أكيد مفيش مانع تدلع نفسك بحاجة غالية من وقت للتاني، زي خروجة أو سفرية أو أكلة حلوة، لكن ماينفعش ده يكون نظامك باستمرار. وتقدر تبقى تعيد ترتيب أمورك لما دخلك يزيد.
عدم الاستثمار في تعليم الذات وتطوير المهارات
إحنا عايشين في عالم بيتغير باستمرار، وده بيشمل كل ظروف الحياة بما فيها فرص العمل، وعشان تكون دايمًا على استعداد لأي فرصة جديدة، ماتنساش تستثمر في تطوير مهاراتك.
تقدر تتعلم حاجة جديدة في مجال يهمك أو تطور مهارة عندك بالفعل بطرق مختلفة، زي ورش العمل وقراءة الكتب أو حتى من خلال يوتيوب.
المهارات دي هتكون وسيلتك للفوز بفرص عمل مميزة، هتكون بعوائد مالية أكبر، تسمح لك بالادخار، وتخليك تعيش الحياة اللي بتتمناها.
مقترح
فن وثقافة
شبابيك بتطل على القاهرة.. مشروع فني لتوثيق ملامح العاصمة وقت الغروب
Frames of Cairo القاهرة +4
الحياة في كايرو
