دكان زمان.. يا روايح الفن الجميل
إيمان قطب دكان زمان رسومات هاند ميد شراء هدايا أونلاين محلات هدايا في القاهرة هدايا أفريقيا هدايا مصرية هدايا هاند ميد في القاهرة
Mohamed Talaat
لو بتدور على هدية مختلفة في القاهرة، يبقى لازم تشوف التصميمات اللي معظمها من روح جنوب مصر، واللي فيها لمسة من النوبة والصعيد. ده اللي بتعمله إيمان قطب، صاحبة براند “دكان زمان”، واللي كل منتجاتها هاند ميد، برسومات وأفكار خاصة، وهدفها تخلي لكل شخص ذكرى حلوة مع كل هدية.
خلال السطور الجاية هنعرفكم أكتر على “دكان زمان”.
إيمان قطب هي مؤسسة مشروع “دكان زمان” الفني، واللي بتسعى من خلاله لترسيخ الفنون اليدوية، وهي فنانة تشكيلية وخريجة آداب عين شمس، وبدأت المشروع من 2015، وبتقدم من خلاله هدايا كتير زي الإكسسوارات واللوحات والتابلوهات والمجات وغيرهم من الحاجات المهمة في حياتنا اليومية.
وبتقول “إيمان” إنها بتهتم بالخامات عالية الجودة، ومش بتستخدم غير اللي بتختبره بنفسها وتشوف أنه هيكون مناسب للعملاء وغير ضار بيهم وكمان يعيش لأطول فترة ممكنة، علشان كده بتستخدم ماتيريال غالية زي الأكريليك والبورسلين، ودايمًا بتبتكر تصميمات غير تقليدية وبترفض نقل أي تصميم مهما كان مميز، بتحب يكون الإبداع نابع من جواها للعميل بتاعها، حتى لو كانت الفكرة من العميل نفسه.
إيمان قطب عملت خطوة بيتجاهلها كتير من المصممين المصريين، وهي تسجيل شغلها وأفكارها كحقوق ملكية فكرية، ودايمًا بيكون عندها جديد لأنها بتعتمد على التطوير من شغلها، مع الحفاظ على الطابع المصري والأفريقي.
كل شغل “إيمان” بيكون مرسوم يدوي مهما كان الأمر مرهق وصعب، زي الـ”مجات – إكسسوارات بأنواعها – أجندات – تابلوهات جلد – تابلوهات كانفاس – أحذية – مخدات”، وغيرهم من المنتجات المميزة،.
إيمان قطب كمان بتعمل ورش كتير لتعليم الرسم على المنتجات، وبتمثل مصر في المعارض الدولية في مصر وبره لأنها متميزة في شغلها، وتقدروا تعرفوا أكتر عنها من خلال صفحة فيسبوك من هنا.
