The Definitive Guide to Living in the Capital , Cairo , Egypt

موجود فى 330 شارع الهرم محطة مدكور، فى مركز “دارى” ممكن تجهز بيتك وتفرشه بديكور يناسب شخصيتك كل أركانه متناسقة لأن كل قطعة هـ تشتريها هـ تلاقى فى نفس المكان كل اللي يناسبها وبالتالي بسهولة ومن مكان واحد تقدر تفرش بيتك بكل كمالياته بدون لف على المحلات والمعارض، ومن ناحية الأذواق نقدر نطمئن جدًا لأن فى مركز “دارى” هـ نلاقى كل اللى يناسب أذواقنا مهما اختلفت وكمان أحدث الموديلات فى كل قطعة ديكور أو أثاث.

المركز مقسم إلى أقسام كثيرة وفيه كل حاجة من أول المج لغاية زرع الزينة والنجيلة الصناعية، وعلشان كده مساحته كبيرة جدًا بالضبط 7000 متر مربع بـ يبدأ بركن الأثاث وفيه هـ نلاقى أحدث موديلات الأنتريهات وغرف النوم وغرف المعيشة والمكاتب وحسب مساحة الحجرة ممكن ينفذوا لنا التصميم يعنى المساحة مش هـ تكون عائق فى الموديل اللى إحنا عاوزينه بعد كده.

وعلشان المطبخ هو المكان اللى بـ يحتوى على حاجات أكثر من حجمه فعملوا له قسم كبير فيه كل حاجة من الشوكة لغاية مريلة وفوط المطبخ، فى القسم ده كل أنواع أطقم الأطباق والأوانى الصينى والأركوبال والألومنيوم والتيفال وغيرهم وكمان كل أنواع الزجاج الخاص بالمطبخ زى الكوبايات والكؤوس وإكسسوارات المطبخ بالكامل وحتى المطبخ نفسه سواء خشب أو ألوميتال.

ولأن حجرات الأطفال لازم تكون لها روح معينة علشان تناسب ميول الأطفال فهـ نلاقى فى “دارى” حجرات أطفال مكونة من أشهر شخصيات الكرتون اللى بـ يحبها الأطفال يعنى ممكن تلاقى سرير على شكل قلعة أو قصر وممكن تلاقى مكتب أطفال على شكل عربية وله بالفعل عجل لسهولة نقله من مكان لآخر فى الحجرة حسب رغبة الطفل كمان متوفر فى “دارى” كل إكسسوارات الأطفال الخاصة بحجرات البنات والأولاد.

وكمان الأنتريهات وحجرات المعيشة لها حظ كبير من الإبداع والأناقة والمقاسات متنوعة لتناسب مساحات مختلفة، ولو حابين نفتح مكتب أو شركة ممكن نختار أثاث المكتب بالكامل، ومن ناحية الأسعار مافيش داعى نقلق لأن الأسعار فى المتناول، يعنى مثلًا أسعار الأنتريهات بـ تبدأ من 4000 جنيه، وكمان مافيش داعي ندور كثير عن إكسسوار الفراندات والبلكونات لأن فى “دارى” كل ده هـ يكون متوفر وبأسعار مناسبة يعنى مثلاً كرسى الخرزان بـ يبدأ سعره من 350 جنيه.

فيه هناك كمان ألوان الدهانات المناسبة للأثاث اللى هـ نختاره وكمان العمال اللى هـ ينفذوا الدهانات دى بحرفية عالية، وطبعًا حسب الدهان بـ نحدد أنواع الشبابيك والأبواب وهـ نلاقيها متوفرة حسب أذواقنا وأسعارها كمان مختلفة يعنى مثلاً باب خشب 4 حشو سعره 280 جنيه وباب أكورديون سعره بـ يبدأ من 300 جنيه.. وفيه قسم خاص لنباتات الزينة والنجيلة الصناعية وكمان كل مستلزمات العناية بالنباتات.

فيه قسم خاص للستائر بأنواعها المختلفة بلاك أوت والشيفون وحتى ستائر البامبو وموجود ماركات مختلفة وكل ماركة لها سعر خاص وطبعًا المقاسات مختلفة حسب مكان الستارة.

ومن الحاجات اللى فيها إبداع كبير وبـ تعتز بها كل سيدة فى ديكور بيتها هى الفازات والبيت ما يكملش من غيرها، فيه تشكيلة حلوة جدًا من الفازات الصينى والكريستال والزجاج الفاخر وسعر الفازات الزجاج مثلاً يبدأ من 149 جنيه إلى 500 جنيه ومقاسات مختلفة.

المبنى كبير جدًا وبـ يحتوى على حاجات كثيرة صعب أننا نعرف كل حاجة فى المكان من زيارة واحدة لأن القسم الواحد بـ يأخذ وقت كبير مننا علشان نتفقد كل حاجة فيه خصوصًا أن الموديلات ملفتة جدًا وجذابة واللى بـ يشجعنا على أننا نبقى عاوزين نشوف كل حاجة أن الأسعار مناسبة وفى المتناول.