The Definitive Guide to Living in the Capital , Cairo , Egypt

يمنى أحمد

قدماء المصريين موجودين معانا بقوة في الزمن ده، صورهم مطبوعة على منتجات كتير، ما بين حقائب وتيشيرتات وكابات وأكثر،  ويكفي زيارة لشارع المعز أو خان الخليلي علشان تشوف كمية المنتجات الرائعة اللي عليها صور من مصر القديمة! مؤخرًا، اتعرفنا على مكان اسمه Bazaar Horus، القائمين عليه بيبدعوا حقائب بنفس جمال رسومات قدماء المصريين.. خلينا نشوف إيه حكايتهم في السطور الجاية.

خان الخليلي مليان حواديت كتير، وفي ممر ضيق من ممراته اختار بازار حورس إنه يسيب أثر فيه، أثر بيحكي عن إبداع المصريين وأفكارهم وحبهم للبلد دي اللي ببرجع لسنين كتير، بيعبروا بيه برضه عن نوستالجيا الماضي والحنين لعهد كان له فضل على مصر واسمها، علشان كده تمثلت فكرة القائمين عليه في الحاجات اللي كلنا بنستخدمها، زي الشنط الجلد والبوكات وشنط السفر، ودي حاجة جميلة لعشاق تراب البلد دي وتراثها.

الرسومات اللي على الشنط والصور المطبوعة مش مجرد رسمة عادية، دي حب طالع من قلوب اللي عاملينها مخصوص لقدماء المصريين اللي بينوروا أي مكان موجودين فيه، ده غير إن الشنط دي أصلا متقفلة كويس بشهادة كل العملاء بتوعهم، غير الألوان المبهجة اللي مش هتحسسك بأي ملل، بل كمان ممكن تكون علامة واضحة أوي الناس تعرف بيها أنك مصري أصيل، أصل مش أي حد هيتشري الشنط دي برضه!

خلينا نقولك إنك لما تشتري شنطة لك من هناك هتحس إنك رجعت لزمن الأجداد العظيم، وهتحط فيها مستلزماتك الشخصية وأنت حاسس إنك بتحط عمر تاني فوق العمر الحقيقي للشكل المرسوم عليها، سواء كانت ملكة من الملكات الساحرات، أو نقوش ورموز هتحسسك بالبهجة والعظمة.

غير الشنط اللي عليها رسومات مصرية قديمة، “حورس” عندهم منتجات أكتر، رسومات عصرية وإبداعية.. شوفوا التشكيلة كلها من هنا.