The Definitive Guide to Living in the Capital , Cairo , Egypt

مع دخول شهر رمضان 2024 بتتملي شوارع المحروسة بزينة مخصصة للاحتفال بالشهر الكريم، وزينة رمضان بدء ظهورها في مصر في العصر الفاطمي، وزمان كانت عبارة عن أعلام بيتم ربطها بحبال وتتعلق في شوارع القاهرة، وبالليل كانت الفوانيس والمصابيح بتزين أبواب المحلات والمنازل، وكانت الأعلام الخاصة بزينة رمضان مصنوعة من القماش واتطورت ووصلت أنها بتتصنع من الفوم والبلاستيك والورق وكمان فيه منها بيشتغل بالكهرباء، ولأهمية زينة رمضان في المنازل والشوارع هنتعرف مع بعض على 5 مناطق بتبيع زينة رمضان 2024 في القاهرة بأشكال متنوعة وأسعار معقولة.

الخيامية

يعتبر شارع الخيامية هو الأصل في بيع زينة رمضان بكل أنواعها وخاصة المصنوعة من قماش الخيامية والقماش القطيفة، وتقدروا تفصلوا أي زينة محتاجينها للشهر الكريم، وهو موجود في منطقة الأزهر خلف مسجد الغوري.

تحت الربع

من أرخص الأماكن اللي هتلاقوا فيها زينة رمضان بأشكالها العصرية المميزة وفيه منها الهاند ميد والمصنع وزي ما بيقال هتلاقوا هناك من الإبرة للصاروخ، وتحت الربع موجود في منطقة باب الخلق في القاهرة.

المزين

وهي حارة موجودة في منطقة الموسكي، وهتلاقوا فيها محلات بتبيع زينة رمضان بكل أنواعها من النحاس والخشب والزجاج والورق والبلاستيك وغيرها، والأسعار فيها بتبدأ من 10 جنيه.

السيدة زينب

مع دخول شهر رمضان بتنتشر في منطقة السيدة زينب الشوادر اللي بتتخصص في بيع كل اللي محتاجينه من زينة رمضان سواء المنتجات الشعبية أو العالية، وهتلاقوا عندهم كل اللي محتاجينه مهما كانت صناعته وخامته، وتقدروا تلقوا الشوادر دي حول مسجد السيدة زينب.

حارة اليهود

رغم صعوبة الوصول ليها وخاصة مع ازدحام شارع الموسكي والأزهر أن المتاح من زينة رمضان داخل حارة اليهود تشكيلة كبيرة متنوعة فيها على كل لون وشكل وخامة، ونصيحة من فريق كايرو 360 متشتروش من العربيات الخارجية ولفوا شوية في المحلات هتلقوا أسعار أرخص بكتير.