The Definitive Guide to Living in the Capital , Cairo , Egypt

العملية الشرائية في كتير من الأوقات بتكون عبء، خاصة مع زيادة الأسعار، وممكن بسبب الميزانية نأجل حاجات كتير محتاجينها، وعلشان كده ظهر تطبيق Tabby، اللي بيقدم حلول تسويقية بالتقسيط بالشراكة مع بعض المحلات والمواقع الأونلاين، وتقدروا من خلاله تشتروا كل اللي محتاجينه زي مستلزمات المطبخ ومنها المواد الغذائية، والأجهزة الكهربائية والإلكترونيات، وكل ده بدون فوائد على 4 شهور، وده بيخلي عملية الشراء سهلة.

،خلال السطور الجاية هنقول لكم على طريقة الإشتراك في التطبيق والاستفادة منه في تقسيط المشتريات بعد تجربتنا ليه أكتر من مرة.

تابي تطبيق بيشجع الشراء المسئول فبالتالي مش بيوافق على كل حاجة، ولكن في الأساس لو الأكونت بتاعكم اتقبل هتقدروا تشتروا أي حاجة أساسية ومهمة بدون ما يكون فيه حد للشراء، وعلشان تقدروا تعملوا ده لازم تشتركوا في التطبيق وتعملوا حساب جديد، وبعد ما تعملوا حساب بتدخلوا على التطبيق وتشوفوا المتاجر اللي متعاقد معها التطبيق حسب فئة الشراء، فمثلًا تقدروا تشتروا أجهزة كهربائية من نون، ولكن متقدروش تشتروا إير بودز حاليًا، لأنها من الحاجات الترفيهية وزي ما قلنا هو بيشجع الشراء المسئول.

وإحنا في كايرو 360 جربنا التطبيق لفترة قبل ما نكتب عنه وهنقول لكم على تجربتنا واللي فيها خطوات الشراء.

عملنا أكونت جديد وبدأنا نتصفح التطبيق ولقينا أنهم حاطين موقع نون كبداية “حاليًا القائمة بقت فيها أماكن كتير”، ودخلنا على نون ودورنا على منتج ممكن نحتاجه وفي نفس الوقت مايكنش غالي فطلبنا إيربودز سعره 1200 جنيه، ولما حاولنا نعمل العملية رفض، وبعتنا للدعم الفني ميل فقالوا أنه لا يوجد مشكلة في التطبيق وبرجاء المحاولة مع منتج آخر.

فقررنا نجرب في الأجهزة الكهربائية واشترينا هاند بلندر سعره 3000 جنيه، وعملنا عملية شراء عادية جدًا من موقع نون وحطينا كود خصم فعمل لنا خصم 25 جنيه وشحن مجاني، وفي الدفع طلبنا الدفع من خلال Tabby، وحولنا على صفحة تابي، وملينا البيانات “تصوير الرقم القومي وش وضهر – بيانات الكارت البنكي – الإسم”، وطبعًا لازم الكارت البنكي يكون فيه رصيد يكفي أول قسط، وكمان لما بتطلبوا أول مرة هيكون فيه 100 جنيه كاش باك هدية تقدروا تستخدموها في تاني قسط، يعني كمان هتوفررو، وبكده أول قسط كان 743.75 جنيه.

بعد ما تم تأكيد طلب المنتج وتحديد موعد وصوله قررنا نجرب تاني ونطلب حاجة تاني علشان نعرف هل متاح نطلب تاني ولا لأ وطبعًا كنا متأكدين أنه ماينفعش، وهنا كانت المفاجأة التطبيق طلب مننا نسدد قسط كمان علشان نقدر نطلب أوردر تاني، وبالفعل سددنا قسط بس المرة دي 643.75 جنيه، علشان الـ100 جنيه كاش باك، وطلبنا بالفعل أوردر تاني تمنه 1500 جنيه واتقسم على 4 أقساط وسددنا أول قسط وكان 375 جنيه.

التطبيق في مجمله لطيف وسهل الاستخدام وبيتوسع بشكل كبير وبسرعة، وحاليًا قائمة عملائه كبيرة وهو بيتوسع خاصة في المنتجات القليلة السعر أقل من 5000 جنيه علشان يوفر للناس إمكانية الشراء بدون أعباء مالية، وطبعًا ماتنسوش أن في حالة عدم التسديد أو التأخير في السداد ده هيأثر على  الهاي سكور بتاعكم في البنك المركزي، فلازم حسابكم البنكي يكون فيه القسط قبل ميعاده علشان يقدر يسحبه بدون مشاكل، والتطبيق آمن تمامًا في الاحتفاظ بالكارت البنكي، وأي حد بيحاول الدخول من خلال حسابكم لازم يوصل له كود جديد لتأكيد الدخول للحساب على رقم الهاتف المسجل.

تقدروا تحملوا التطبيق من هنا.