شنطة “مروة”.. حكاية فنانة مصرية بتقدم إبداع بطعم مصر القديمة
حضارة فرعونية شنط مصرية صناعة مصرية صنع في مصر
Mohamed Talaat
مصر جميلة بحضارتها القديمة، ودايمًا المصريين فخورين بأنهم أبناء 7000 سنة حضارة، وبيطلق علينا “أحفاد الفراعنة”، ويكفي أننا من أعظم وأقدم حضارات العالم وأننا كنا مصدر للجمال والثقافة، ولأننا أحفاد الحضارة المصرية القديمة، فلازم نكون دايمًا مهتمين بتاريخنا العظيم، وده اللي عملته مروة جمال اللي أبدعت في تصميم وتصنيع شنط نسائية بتعبر عن ثقافتنا وحضارتنا ونجحت في تقديم منتج مميز بيعبر عن هويتنا المصرية.
تعالوا نتعرف أكثر على “مروة” وشنطها المصرية الجميلة اللي بتحكي حكايات عن تاريخ بلدنا.
بدأت الدكتورة مروة جمال حياتها العملية لما كانت بتساعد والدها في مشروعه الصغير الجانبي وهو عبارة عن محل لبيع الأحذية والشنط بصفتها أكبر أخواتها، ومن هنا اكتسبت الخبرة بسبب أنها كانت دايمًا معاه في المحلات والورش بتنقي الموديلات، وكان حلمها من وهي في الكلية أنها ماتبعش نفس موديلات المحلات ويكون عندهم مصنع خاص بموديلات فريدة، ولكن والدتها كانت بتعارض جدًا الفكرة لأنها مش حابة بنتها تقف وسط الصنايعية ورفضت تمامًا، ورضيت بالأمر الواقع أنها تدير محل والدها وبس.
انقلبت حياة “مروة” بعد وفاة والدها عام 2016 والمحل اتقفل وبعدت عن المجال ولكن الحلم مازال معاها في كل وقت، وكانت بتزعل لما تلاقي منتجات “صيني” في السوق بتقلد الثقافة المصرية وكمان دون المستوى، وجت لها الفرصة أنها تتقدم خطوة لحلمها في أغسطس 2023 لما كانت بتعمل رسالة دكتوراه وكان من ضمن مواد التمهيدي مادة ريادة الأعمال.
وكان مشروع التخرج “عمل دراسة جدوى”، وهنا عرضت الفكرة على الفريق بتاعها على أساس يبقى مشروع التخرج بتاعهم، وقدرت تقنعهم لأنها عندها كل المعلومات الخاصة بالمشروع وأقتنعوا بالفكرة وحظهم أن كان عندهم دكتور المادة اللي يخليهم يخرجوا أفضل ما عندهم، وابتدوا بالفعل في مشروع دراسة الجدوى واستطلاع الرأي والمقابلات وعملوا إعلانات وصفحات تواصل اجتماعي وكل خطوة كانت بتتم بتخلي حماس وحلم مروة جمال أقوى، وده خلاها تقترح على التيم أنها تعمل عينات من الفكرة وتقدمها يوم مناقشة مشروع التخرج، وبالفعل نزلت الورش اللي كانت بتتعامل معاها زمان مع والدها وشرحت لهم الفكرة وبدأت في تنفيذ عينات مبدأية لمشروع التخرج، ولكن في الحقيقة هي بتاخد خطوات لا شعورية من أجل حلمها.
وخلال مناقشة مشروع التخرج بقى فيه انبهار بسبب الفن والعينات اللي عملتها والدكتور كان فخور بها وقال لها “حرام ده يبقى مجرد مشروع تخرج”، ومن هنا أخدت قرار فور خروجها من المناقشة أنها هترجع لحلمها ومش هتسيبه، وابتدت ترسم تصميم جديد غير مشروع التخرج ونفذته ولقت الناس كلها بتبعت تسألها عن الأسعار والموديلات والألوان، وهنا لقت مروة نفسها وحققت حلمها.
مروة جمال بتستخدم خامات منها القماش المعالج والمطبوع بأحدث التقنيات مطعم بأنواع جلد مختلفة باختلاف الموديل لخدمة التصميم وفكرته، وعندها وقت التسليم بيكون بداية من يوم واحد لو الموديل المطلوب متوفر منه في المخزن، وأسبوع لو المطلوب موجود في دفعة التشغيل اللي جاية، وأقصى مدة 14 يوم لو الموديل مش في الدفعة اللي هتستلمها، وده بيحكمه اتاحة الموديل والألوان المطلوبة.
حتى الآن مشروع مروة جمال أونلاين، ولكن هي بتسعى لكسب شركاء في المحلات بالمناطق السياحية زي شرم الشيخ والغردقة والأقصر وأسوان علشان توفر لهم المنتجات بتاعتها اللي بتعبر عن الحضارة المصرية بالكامل، وأسعار الشنط عندها بتبدأ من 550 جنيه، وحاليًا هي بتقدم 5 موديلات أساسية وكل أسبوع بتنتج ألوان مختلفة من الموديلات دي.
تقدروا تعرفوا أكتر عن مشروع مروة جمال Me for unique leather products من خلال صفحة الفيسبوك من هنا.
