The Definitive Guide to Living in the Capital , Cairo , Egypt

الحلويات ليها مكانة خاصة في قلوب المصريين، وكل نوع من الحلويات له رواده ومحبيه اللي بيدوروا على أحسن وأحلى مكان بيعمله، ورغم أن محلات الحلويات موجودة في كل مكان لكن من بعد أزمة فيروس كورونا المستجد (كوفيد 19) زادت نسبة طلب المنتجات أونلاين بشكل عام، علشان كده ظهر موقع “بيستاشيو”، اللي أغلق كل فروعه مؤخرًا للحفاظ على صحة العملاء والعاملين وقرر بس إنه يبيع منتجاته أونلاين، وخلال السطور الجاية هنقول لكم على تجربتنا مع الموقع الجديد اللي نقدر نعتبره الأول من نوعه في مصر كموقع متخصص في الحلويات بكل أنواعها.

الموقع في مجمله بسيط وسهل الاستخدام، وهتقدروا تتعاملوا معاه بسهولة شديدة من خلال الكمبيوتر، لكن ممكن تحسوا ببعض الصعوبة في التعامل معاه من خلال الموبايل.

الموقع بيجمع كل أنواع الحلويات الشرقية والغربية اللي بتتصنع طازة مش متخزنة، وبتوصلكم في نفس اليوم لو طلبتوا منهم قبل الساعة 2 ظهرًا، وده معناه أنكم لو عندكم عزومة لازم تبقوا عارفين هتطلبوا إمتى وهتوصلكم إمتى لأنهم ماعندهمش خدمة الدليفري السريع للأسف.

جربنا الموقع وقررنا نطلب منه منتجات، وطلبنا منهم إكلير بالكراميل ودي زي ما بيقولوا كراميل مظبوط وطعمه حكاية، وسعره 25 جنيه، وكمان جربنا براونيز شيكولاتة شيبسي بـ25 جنيه، وده نقول فيه شعر وحكايات وتفاصيل تخلينا نقول أنه أحسن منتج عندهم.

ومن ضمن تجاربنا كانت كب كنافة بالترمايسو واللي كانت متغرقة بالشيكولاته، وسعرها 30 جنيه، وطعمها مميزة جدًا، وكمان جربنا كنافة باللوتس، بـ32 جنيه، اللي كانت متغرقة بكريمة اللوتس الشهيرة واللي بقت أشهر من أي كريمة تانية، وطعمها حكاية.

وعلشان العيد وفرحته قررنا نجرب منتجات العيد من بيستاشيو، وكانت علبة المشكل سعرها 475 جنيه ووزنها أكتر من 3 كيلو، فيها كحك وبسكويت وبيتي فور مشكلين، ولو شرحنا كل منتج لوحده مش هنوفيه حقه، ولكن خلينا نقول أننا من زمان مادقناش منتجات العيد بالحلاوة والدقة دي، ونقدر نقول إنها معمولة بحب.

التجربة كانت مميزة والمنتجات وصلتنا الساعة 3 عصرًا، رغم أننا طلبناها الساعة 10 الصبح، ولكن الحاجة الوحيدة اللي ماعجبتناش في التوصيل أن التوصيل كان بعربية ملاكي مش عربية ثلاجة، وده خلى المنتجات توصل مع ارتقاع درجة الحرارة مش متماسكة، ولكن اتحلت بأننا حطيناها في التلاجة فترة مش كبيرة، ونتمنى أنهم ينقلوا منتجاتهم في عربية متخصصة تحافظ على برودة المنتجات.

علشان تعرفوا أكتر عن بيستاشيو وطرق التواصل معاهم زوروا صفحتهم على الفيسبوك من هنا.

ولو عاوزين تطلبوا من منتجاتهم زوروا موقعهم الإلكتروني من هنا.